പത്തനംതിട്ട: ശബരിമല ഉത്സവത്തിന് സമാപനംകുറിച്ച് ശബരീശന് ഇന്ന് പുണ്യ പമ്പയില് ആറാട്ട്. രാവിലെ 9ന് സന്നിധാനത്ത് നിന്ന് പമ്പയിലേക്ക് ആറാട്ടിനായി ആനപ്പുറത്ത് എഴുന്നള്ളിപ്പ് പുറപ്പെടും.
വെളിനെല്ലൂര് മണികണ്ഠന് എന്ന ഗജവീരനാണ് ഭഗവാന്റെ തിടമ്പേറ്റുന്നത്. ചടങ്ങുകള്ക്ക് തന്ത്രി കണ്ഠര് മഹേഷ് മോഹനര്, മേല്ശാന്തി ഇ.ഡി. പ്രസാദ് നമ്പൂതിരി എന്നിവര് മുഖ്യകാര്മികത്വം വഹിക്കും. 10.30നും 11.30നും ഇടയിലാണ് പമ്പാനദിയില് പ്രത്യേകം തയാറാക്കിയ കടവില് ആറാട്ട്. ആറാട്ടിന് ശേഷം പമ്പാ ഗണപതി ക്ഷേത്രത്തിന് മുന്നിലെ നടപ്പന്തലില് എഴുന്നള്ളിച്ചിരുത്തും.
ഇവിടെ ഭക്തര്ക്ക് പറ സമര്പ്പണത്തിന് സൗകര്യമുണ്ടാകും. 3.30ഓടെ സന്നിധാനത്തേക്ക് തിരിച്ചെഴുന്നള്ളിപ്പ് ആരംഭിക്കും. വൈകിട്ട് ഏഴോടെ സന്നിധാനത്തെത്തും. തുടര്ന്ന് കൊടിയിറക്കും. പൂജകള് പൂര്ത്തിയാക്കി രാത്രി 10ന് നട അടയ്ക്കും. ആറാട്ട് ദിനമായ ഇന്ന് രാവിലെ 8 മണിക്ക് ശേഷം പടി ചവിട്ടാന് അനുവദിക്കില്ല. രാത്രി ഏഴിന് ശേഷമേ ഇന്ന് ദര്ശനം അനുവദിക്കൂ.
ഉത്സവത്തിന്റെ ഭാഗമായ പള്ളിവേട്ട ഇന്നലെ നടന്നു. രാത്രി 8.30ന് അത്താഴപൂജയ്ക്ക് ശേഷം ശ്രീഭൂതബലി എഴുന്നള്ളത്തും വിളക്കിനെഴുന്നള്ളിപ്പും പൂര്ത്തിയാക്കിയ ശേഷമാണ് ശരംകുത്തിയിലേക്ക് പള്ളിവേട്ടയ്ക്ക് പുറപ്പെട്ടത്. വാദ്യമേളങ്ങളും തീവെട്ടികളും ഇല്ലാതെയായിരുന്നു പള്ളിവേട്ട പുറപ്പാട്. പള്ളിവേട്ടയ്ക്ക് ശേഷം വാദ്യമേളങ്ങളും ദീപപ്രഭയും തീവെട്ടികളുമായി ആഘോഷത്തോടെയായിരുന്നു സന്നിധാനത്തേക്ക് തിരിച്ചെഴുന്നള്ളത്ത്.
