പത്തനംതിട്ട: കേന്ദ്ര സര്ക്കാര് രാജ്യവ്യാപകമായി നടപ്പാക്കിയ സൗജന്യ ചികിത്സാ പദ്ധതിയായ ആയുഷ്മാന് ഭാരത് അടക്കം ഒരു ഡസനോളം ക്ഷേമ സംരംഭങ്ങള് കേരള സര്ക്കാര് അട്ടിമറിച്ചെന്ന് ആറന്മുള നിയോജകമണ്ഡലം എന്ഡിഎ സ്ഥാനാര്ത്ഥി കുമ്മനം രാജശേഖരന്. എന്ഡിഎ വിജയിച്ചാല് ഈ പദ്ധതികള് സാധാരണക്കാരിലേക്ക് എത്തിക്കുമെന്നും അദ്ദേഹം വ്യക്തമാക്കി.
സാമ്പത്തികമായി പിന്നാക്കം നില്ക്കുന്ന കുടുംബങ്ങള്ക്ക് പ്രതിവര്ഷം അഞ്ച് ലക്ഷം രൂപ വരെ സൗജന്യ ചികിത്സ ഉറപ്പാക്കുന്ന കേന്ദ്ര ആരോഗ്യ ഇന്ഷുറന്സ് പദ്ധതിയാണ് ആയുഷ്മാന് ഭാരത്.
1,400ലധികം രോഗങ്ങള്ക്ക് ഗുണനിലവാരമുള്ള ആശുപത്രികളില് മികച്ച ചികിത്സ ലഭ്യമാകും. 2011-ലെ സെന്സസ് പ്രകാരം ദരിദ്രരും ദുര്ബലരുമായ കുടുംബങ്ങള്ക്ക് ഇതിന്റെ ഫലം ലഭിക്കും. സംസ്ഥാന സര്ക്കാര് പദ്ധതി കേരളത്തില് നടപ്പാക്കാത്തത് കേന്ദ്രസര്ക്കാരിന്റെ ക്ഷേമ പദ്ധതികള് നേരിട്ട് ജനങ്ങളില് എത്തുന്നത് തടയാനാണെന്നും ഇത് പാവപ്പെട്ടവരോടുള്ള കടുത്ത ദ്രോഹമാണെന്നും കുമ്മനം പറഞ്ഞു.
ലൈഫ് മിഷന് എന്ന അപര നാമത്തില് സംസ്ഥാന സര്ക്കാര് കുളമാക്കയ കേന്ദ്ര ഭവന പദ്ധതിയാണ് പ്രധാനമന്ത്രി ആവാസ് യോജന. വീടില്ലാത്തവര്ക്ക് വീട് നല്കുന്ന പദ്ധതി പക്ഷേ കേരളം കാര്യക്ഷമമായി നടപ്പാക്കിയില്ല എന്ന് മാത്രമല്ല കേന്ദ്ര പദ്ധതിയാണെന്ന സത്യം ജനങ്ങളില് നിന്ന് മറച്ചുവെക്കുകയും ചെയ്തു.
ശുചിത്വ പരിപാലനവുമായി ബന്ധപ്പെട്ട സ്വച്ഛ് ഭാരത് മിഷന്, കാര്ഷിക ജലസേചന പദ്ധതിയായ പ്രധാനമന്ത്രി കൃഷി സിഞ്ചായി യോജന, തൊഴിലധിഷ്ഠിത നൈപുണ്യ വികസനത്തിന് നടപ്പാക്കിയ പ്രധാനമന്ത്രി കൗശല് വികാസ് യോജന, ആരോഗ്യ മേഖലയ്ക്കായി വിഭാവനം ചെയ്ത ദേശീയ ആരോഗ്യ ദൗത്യം, ചെറുകിട സംരംഭകര്ക്ക് വായ്പ അനുവദിക്കുന്ന പ്രധാനമന്ത്രി മുദ്രാ യോജന എന്നിവയും രാഷ്ട്രീയ വൈരത്താല് പിണറായി സര്ക്കാര് അവഗണിച്ചതായി കുമ്മനം ചൂണ്ടിക്കാട്ടി.
കൊവിഡ് കാലം മുതല് കേന്ദ്രം ആരംഭിച്ച സൗജന്യ റേഷന് പദ്ധതിയെപ്പറ്റി സാധാരണ ജനങ്ങള്ക്ക് കാര്യമായ അറിവില്ല. പിണറായിയുടെ ദാനമാണിതെന്ന് കരുതുന്നവരും നിരവധി.
എന്നാല് 2020 ഏപ്രില് മാസത്തില് ആരംഭിച്ച പ്രധാനമന്ത്രി ഗരീബ് കല്യാണ് അന്ന യോജന പദ്ധതി പ്രകാരം മഞ്ഞ കാര്ഡിന് പ്രതിമാസം 35 കിലോ അരി ലഭിക്കും. മറ്റ് കാര്ഡുകള്ക്ക് അതിനനുസരിച്ചുള്ള ധാന്യവും ലഭ്യമാകും. 2028 ഡിസംബര് മാസം വരെയാണ് ഈ സൗജന്യം. പക്ഷേ സാധാരണക്കാരില് നിന്ന് ഇക്കാര്യം ഇടത് സര്ക്കാര് ബോധപൂര്വം മറച്ചു വയ്ക്കുകയാണെന്നും കുമ്മനം പറഞ്ഞു.
