തിരുവനന്തപുരം: രാഷ്ട്രീയ പാര്ട്ടികള്ക്ക് മുഖ്യ തിരഞ്ഞെടുപ്പ് ഓഫീസറുടെ ഓഫീസില് നിന്നയച്ച കത്തില് ബിജെപി സീല് പതിഞ്ഞ സംഭവത്തില് ഡെപ്യൂട്ടി സി ഇ ഒ,സെക്ഷന് ഓഫീസര് എന്നിവരെ തിരഞ്ഞെടുപ്പ് ഡ്യൂട്ടികളില് നിന്നും ഒഴിവാക്കി.അഡീഷണല് സി ഇ ഒ പി ബി നൂഹിന്റെ റിപ്പോര്ട്ട് കണക്കിലെടുത്താണ് നടപടി.നേരത്തെ സെക്ഷന് ഓഫീസറെ സസ്പെന്റ് ചെയ്തിരുന്നു.
തിരഞ്ഞെടുപ്പ് ഡ്യൂട്ടികളില് നിന്ന് ഒഴിവാക്കിയ ഇവരെ മാതൃഓഫീസുകളിലേക്ക് തിരിച്ചയയ്ക്കാനാണ് ഉത്തരവ്.സീല് വിവാദത്തില് മുഖ്യ തിരഞ്ഞെടുപ്പ് കമ്മീഷണര് രത്തന് യു ഖേല്ക്കര് മറുപടി നല്കിയത് ക്ലറിക്കല് പിഴവാണെന്നായിരുന്നു.സ്ഥാനാര്ഥികളുടെ ക്രിമിനല് പശ്ചാത്തലം സംബന്ധിച്ച് 2019-ല് ബിജെപി തിരഞ്ഞെടുപ്പ് കമ്മീഷന് നല്കിയ കത്താണ് മാറി മെയിലിനൊപ്പം നല്കിയതെന്നും വിശദീകരണത്തില് മുഖ്യ തിരഞ്ഞെടുപ്പ് കമ്മീഷണര് വ്യക്തമാക്കിയിരുന്നു.
2019 മാര്ച്ച് 19ന് തയാറാക്കിയ കത്താണ് തിരഞ്ഞെടുപ്പ് കമ്മീഷന് മെയിലിനൊപ്പം പാര്ട്ടികള്ക്ക് അയച്ചത്. ഈ കത്തില് ആയിരുന്നു ബിജെപിയുടെ സീല് പതിപ്പിച്ചത്. സിപിഎമ്മിന് മാത്രമല്ല.മറ്റ് പാര്ട്ടികള്ക്കും ഇതേ പിഴവോടെയുള്ള കത്തുകള് ലഭിച്ചിട്ടുണ്ടെന്നും ഈ ഇ-മെയില് വന്നിട്ടുള്ളത് തിരഞ്ഞെടുപ്പ് കമ്മിഷന്റെ ഔദ്യോഗിക കേന്ദ്രത്തില് നിന്നാണെന്നുമായിരുന്നു സിപിഎം ആരോപിച്ചത്.
അതേസമയം, ബിജെപിയുടെ സീല് തെരഞ്ഞെടുപ്പ് കമ്മീഷന്റെ ഔദ്യോഗിക രേഖയില് പതിപ്പിച്ചതില് സസ്പെന്ഡ് ചെയ്യപ്പെട്ടത് എന്ജിഒ യൂണിയന്റെ സെക്രട്ടേറിയറ്റ് എംപ്ലോയീസ് അസോസിയേഷന് നേതാവ് ജയ്സില് പി അസീസാണെന്ന് ബിജെപി സംസ്ഥാന ജനറല് സെക്രട്ടറി എസ്.സുരേഷ് ചൂണ്ടിക്കാട്ടിയിരുന്നു.സിപിഎമ്മുമായുള്ള ബന്ധം പരിഗണിച്ച് ഇയാളെ തെരഞ്ഞെടുപ്പ് കമ്മീഷനിലേക്ക് ഡെപ്യൂട്ടേഷനില് വിടുകയായിരുന്നു. ഇയാളാണ് ബിജെപിയുടെ സീല് പതിപ്പിച്ച ഗൂഢാലോചനയ്ക്ക് പിന്നിലെന്നും അദ്ദേഹം വെളിപ്പെടുത്തി.
