തിരുവനന്തപുരം: അധികാരത്തിന്റെ സ്വാധീനമുപയോഗിച്ച് തെരഞ്ഞെടുപ്പിനെ വരുതിയിലാക്കാന് മന്ത്രി വി.ശിവന്കുട്ടി നീക്കം നടത്തുന്നതിന്റെ കൂടുതല് തെളിവുകള് പുറത്ത്. നേമത്തെ എല്ഡിഎഫ് സ്ഥാനാര്ത്ഥി മന്ത്രി വി. ശിവന്കുട്ടി ഭരിക്കുന്ന തൊഴില് വകുപ്പില് നിന്ന് നേമം നിയോജക മണ്ഡലത്തിലെ റിട്ടേണിങ് ഓഫീസര് ഉള്പ്പെടെ തൊണ്ണൂറിലധികം ഉദ്യോഗസ്ഥരെ തെരഞ്ഞെടുപ്പിനായി നിയോഗിച്ചിരിക്കുകയാണ്.
തെരഞ്ഞെടുപ്പ് ചുമതലകള്ക്കായി ഡെപ്യൂട്ടേഷന് ലഭിക്കുന്നതിന് മുമ്പ് വി. ശിവന്കുട്ടിയുടെ ഭരണ നിയന്ത്രണത്തിലാണ് ഈ ഉദ്യോഗസ്ഥര് പ്രവര്ത്തിച്ചിരുന്നത്. തെരഞ്ഞെടുപ്പ് നടത്തിപ്പില് ബിജെപി സ്ഥാനാര്ത്ഥിക്കെതിരെ അവര് തുടര്ച്ചയായി ഇടപെടുന്നത് മന്ത്രിയുടെ ഒത്താശയോടെയാണെന്ന് ബിജെപി ആരോപിക്കുന്നു. ഉദ്യോഗസ്ഥര് മറ്റ് സ്ഥാനാര്ത്ഥികള്ക്ക് ദോഷകരമായും മന്ത്രിക്ക് അനുകൂലമായും പെരുമാറുന്നുവെന്നും പരാതിയുണ്ട്.
തൊഴില് വകുപ്പിലെ ഉദ്യോഗസ്ഥരെ കൂട്ടത്തോടെ തെരഞ്ഞെടുപ്പ് ഉദ്യോഗസ്ഥരായി നിയമിച്ചത് കൂടാതെ എന്ഡിഎ സ്ഥാനാര്ത്ഥി രാജീവ് ചന്ദ്രശേഖറിന്റെ പേരിനോട് സാമ്യമുള്ള സിപിഎം എല്സി സെക്രട്ടറിയായ രാജീവ് കുമാര് എന്നയാളിനെ സ്ഥാനാര്ത്ഥിയാക്കിയതും മന്ത്രി വി. ശിവന്കുട്ടിയുടെ ഇടപെടലിനെത്തുടര്ന്നാണ്.
തെരഞ്ഞെടുപ്പ് ഉദ്യോഗസ്ഥരെ സ്വാധീനിച്ച് ബിജെപിയുടെ ചിഹ്നമായ താമരയോട് സാദൃശ്യമുള്ള ചിഹ്നം അപര സ്ഥാനാര്ത്ഥിക്ക് നല്കിയും അതിന്റെ രൂപകല്പ്പനയില് സമാനതകള് സൃഷ്ടിച്ചും ബിജെപിക്ക് ലഭിക്കേണ്ട വോട്ടുകളില് വിള്ളലുണ്ടാക്കാനുള്ള ശ്രമം നടത്തുകയും ചെയ്തു. ഇതിനെതിരെ ബിജെപി ശക്തമായി പ്രതിഷേധിച്ചതോടെയാണ് ഉദ്യോഗസ്ഥര് ചിഹ്നത്തിലെ സമാനതകള് ഒഴിവാക്കിയത്.
ഇത് സംബന്ധിച്ച് ബിജെപി സംസ്ഥാന മുഖ്യ തെരഞ്ഞെടുപ്പ് ഓഫീസര്ക്ക് പരാതി നല്കി. സംസ്ഥാന ജനറല് സെക്രട്ടറി അഡ്വ. എസ്. സുരേഷാണ് പരാതി നല്കിയത്. പോളിങ് ദിവസം ഉള്പ്പെടെ ബന്ധപ്പെട്ട ഉദ്യോഗസ്ഥര് പക്ഷപാതപരവും മുന്വിധിയോടെയുള്ളതുമായ പ്രവര്ത്തനങ്ങള് ആവര്ത്തിക്കുമെന്ന ആശങ്കയും അറിയിച്ചിട്ടുണ്ട്.
തെരഞ്ഞെടുപ്പ് പ്രക്രിയയുടെ നീതിയും സമഗ്രതയും ഉറപ്പാക്കാന് ഉചിതമായ നടപടികള് സ്വീകരിക്കണമെന്നും, പക്ഷപാതപരമായി പെരുമാറുന്ന ഉദ്യോഗസ്ഥരെ തിരിച്ചുവിളിക്കുകയോ നീക്കം ചെയ്യുകയോ ചെയ്യണമെന്നും അദ്ദേഹം ആവശ്യപ്പെട്ടു.
