കൊച്ചി: ഭാരതീയ അഭിഭാഷക പരിഷത്ത് ഹൈക്കോടതി യൂണിറ്റിന്റെ ആഭിമുഖ്യത്തില് അന്താരാഷ്ട്ര വനിതാ ദിനാഘോഷങ്ങള് സംഘടിപ്പിച്ചു. സ്ത്രീശക്തിയുടെയും നിയമരംഗത്തെ സ്ത്രീ മുന്നേറ്റത്തിന്റെയും പ്രാധാന്യം വിളിച്ചോതിയ പരിപാടിയില് കേരളത്തിലെ ആദ്യ കാഴ്ചപരിമിതിയുള്ള സിവില് ജഡ്ജ് നിയമിത താനിയ നാഥനെ ഹൈക്കോടതി ജഡ്ജി ജസ്റ്റിസ് കുഞ്ഞികൃഷ്ണന് ആദരിച്ചു.
വ്യക്തിജീവിതത്തില് തന്നെ സ്വാധീനിച്ച വനിതാ വ്യക്തിത്വങ്ങളെ അദ്ദേഹം സ്മരിച്ചു. അമ്മയോടൊപ്പം തന്നെ ജീവിതത്തില് സ്വാധീനം ചെലുത്തിയ മഹാരാഷ്ട്രയിലെ ആദ്യ വനിതാ അധ്യാപിക ആയിരുന്ന സാവിത്രി ഭായി ഫൂലെയെ അദ്ദേഹം സ്മരിച്ചു.
ഇന്നത്തെ തലമുറയിലെ അഭിഭാഷകവൃത്തിയില് സ്ത്രീകള് പുരുഷന്മാരെ കടത്തിവെട്ടുന്ന പ്രകടനമാണ് കാഴ്ചവെക്കുന്നതെന്നും അദ്ദേഹം അഭിപ്രായപ്പെട്ടു. ഹൈക്കോടതിയിലെ ഡെ. സോളിസിറ്റര് ജനറല് ഒ.എം. ശാലീന ആശംസകള് അര്പ്പിച്ചു. യൂണിറ്റ് പ്രസിഡന്റ് എന്. അനില്കുമാര് അധ്യക്ഷത വഹിച്ച ചടങ്ങില് ഹൈക്കോടതിയില് വളരെക്കാലമായി സേവനമനുഷ്ഠിക്കുന്ന മോള്ജി ടി.പി,കെ. കെ. ബിന്ദു, പുഷ്പി ബാബു, സലോമി തങ്കച്ചന്, ഭിന്നശേഷി അതിജീവിച്ച് അഭിഭാഷകവൃത്തിയില് പ്രവേശിച്ച അഭിഭാഷക അഖില ശ്രീപാര്വ്വതി എന്നിവരെ ആദരിച്ചു.
കേരളത്തിലെ ആദ്യത്തെ കാഴ്ചപരിമിതിയുള്ള ജുഡീഷ്യല് ഓഫീസറായ താനിയ നാഥന് സി. ചടങ്ങില് മുഖ്യാതിഥിയായിരുന്നു. പ്രതിസന്ധികളെ അതിജീവിച്ച് ലക്ഷ്യസ്ഥാനത്തെത്താന് നിശ്ചയദാര്ഢ്യം അനിവാര്യമാണെന്ന് സ്വന്തം ജീവിതാനുഭവങ്ങളിലൂടെ അവര് ഓര്മ്മിപ്പിച്ചു. ചടങ്ങില് അഡ്വ. ദീപ നോബിള് സ്വാഗതവും അഡ്വ. വിദ്യ ജി. നായര് കൃതജ്ഞതയും അര്പ്പിച്ചു.
