കൊച്ചി : സംസ്ഥാനത്തെ ദേശീയപാത വികസന പദ്ധതികളുടെ ഉദ്ഘാടന ചടങ്ങിൽ നിന്ന് തന്നെ ഒഴിവാക്കിയത് കേരളത്തെ അപമാനിച്ചതിന് തുല്യമാണെന്ന് പൊതുമരാമത്ത് മന്ത്രി പി.എ. മുഹമ്മദ് റിയാസ് . ജനാധിപത്യത്തിന് ഒട്ടും യോജിച്ചതല്ലാത്ത രീതിയിലാണ് കേന്ദ്ര സർക്കാർ പരിപാടി സംഘടിപ്പിച്ചത്. സർക്കാരിന്റെ ധനസഹായത്തോടെ നടപ്പിലാക്കിയ ഒരു പദ്ധതിയുടെ ക്രെഡിറ്റ് ഒറ്റയ്ക്ക് തട്ടിയെടുക്കാൻ ബിജെപി ശ്രമിക്കുകയാണെന്നും റിയാസ് ആരോപിച്ചു.
‘പദ്ധതിയുടെ ഭാഗമായവർക്ക് ചടങ്ങിൽ പങ്കെടുക്കാം, കേരളത്തിന് അവകാശമുണ്ട്. ഭൂമി ഏറ്റെടുക്കൽ ഉൾപ്പെടെ വലിയ തുക സംസ്ഥാന സർക്കാർ നൽകി. എന്നിട്ടും , എന്നെ മനഃപൂർവ്വം ചടങ്ങിൽ നിന്ന് ഒഴിവാക്കി. ഒരു വികസന പദ്ധതിയുടെ ഔദ്യോഗിക ഉദ്ഘാടനത്തിൽ ബിജെപി സംസ്ഥാന പ്രസിഡന്റ് പങ്കെടുക്കുന്നത് എന്തിന്റെ അടിസ്ഥാനത്തിലാണ്?
വികസന പദ്ധതി ഒരു രാഷ്ട്രീയ പരിപാടിയാക്കി മാറ്റി. കേന്ദ്രമന്ത്രി നിതിൻ ഗഡ്കരി ചടങ്ങിൽ പങ്കെടുക്കാത്തത് എന്തുകൊണ്ടാണെന്ന് എനിക്കറിയില്ല. ദേശീയ പാത വികസനത്തിന് കേരളത്തെ പലതവണ പ്രശംസിച്ചിട്ടുള്ള ഒരാളാണ് അദ്ദേഹം. എൽഡിഎഫ് സർക്കാർ ഇല്ലായിരുന്നെങ്കിൽ ഈ പദ്ധതി തന്നെ മുടങ്ങിപ്പോയേനെ. ഇത് കേരളത്തിന്റെ നേട്ടമല്ലെന്ന് വരുത്തിത്തീർക്കാനുള്ള ശ്രമമാണ് ഇപ്പോൾ നടക്കുന്നത്,’ റിയാസ് പറഞ്ഞു.
അതേസമയം, മന്ത്രി റിയാസിനെ ഒഴിവാക്കിയതിൽ പ്രതിഷേധിച്ച് മുഖ്യമന്ത്രി പിണറായി വിജയനും മറ്റ് മന്ത്രിമാരും ചടങ്ങ് ബഹിഷ്കരിക്കാൻ തീരുമാനിച്ചിട്ടുണ്ട്. മുഖ്യമന്ത്രിയും മന്ത്രിമാരായ എം ബി രാജേഷും കെ കൃഷ്ണൻകുട്ടിയും ചടങ്ങിൽ പങ്കെടുക്കില്ല. അവസാന നിമിഷമാണ് ക്ഷണം ലഭിച്ചതെന്നും മണ്ഡലത്തിൽ മറ്റ് പരിപാടികൾ ഉള്ളതിനാൽ ചടങ്ങിൽ പങ്കെടുക്കുന്നില്ലെന്നും മന്ത്രി എം ബി രാജേഷ് വ്യക്തമാക്കി.
