തിരുവനന്തപുരം: യുദ്ധത്തെ തുടര്ന്നുള്ള സാഹചര്യത്തില് ഗ്യാസ് സിലിണ്ടറുകളുടെ പൂഴ്ത്തിവെപ്പും ഡൈവര്ഷനും തടയുന്നതിനായി കര്ശന നടപടികള് സ്വീകരിക്കാന് ഭക്ഷ്യ പൊതുവിതരണ വകുപ്പ് മന്ത്രി ജി.ആര്. അനില് നിര്ദ്ദേശം നല്കി. ജില്ലാകളക്ടറുടെയും ജില്ലാ സപ്ലൈ ഓഫീസര്മാരുടെയും നേതൃത്വത്തില് പരിശോധന സ്ക്വാഡുകള് രൂപീകരിച്ച് ഗ്യാസ് സിലിണ്ടറുകളുടെ ലഭ്യത ഉറപ്പാക്കും. ഇത് സംബന്ധിച്ച വിഷയങ്ങള് ചര്ച്ച ചെയ്യാനായി ഓയില് കമ്പനി പ്രതിനിധികളുടെ യോഗം ഭക്ഷ്യ പൊതുവിതരണ വകുപ്പ് മന്ത്രി വിളിച്ചുചേര്ത്തു.
ഗാര്ഹിക ഉപയോഗത്തിനുള്ള സിലിണ്ടറുകളുടെ വിതരണത്തില് ദൗര്ലഭ്യം ഇല്ലെന്നും വ്യവസായിക ആവശ്യങ്ങള്ക്കായുള്ള സിലിണ്ടറുകള് ഉപയോഗിക്കുന്ന, മുന്ഗണനാക്രമത്തില് പരിഗണിക്കേണ്ടതായിട്ടുള്ള ആശുപത്രികള് പോലെയുള്ള സ്ഥാപനങ്ങളേയും നിയന്ത്രണങ്ങള് ബാധിക്കില്ലെന്നും ഓയില് കമ്പനികള് അറിയിച്ചു. വ്യാവസായിക ആവശ്യങ്ങള്ക്കായുള്ള സിലിണ്ടറുകളുടെ ദൗര്ലഭ്യം ഒരു ഉപഭോക്തൃ സംസ്ഥാനമായ കേരളത്തില് ഉണ്ടാക്കുന്ന പ്രത്യാഘാതങ്ങള് ഗുരുതരമാണെന്നും അതിനാല് നിയന്ത്രണങ്ങളില് ഇളവ് അനുവദിക്കണമെന്ന് ആവശ്യപ്പെട്ടുകൊണ്ട് കേന്ദ്ര സര്ക്കാരിലേയ്ക്ക് കത്ത് അയയ്ക്കുമെന്ന് മന്ത്രി അറിയിച്ചു.
