ന്യൂഡൽഹി: ഇന്ത്യൻ വ്യോമസേനയുടെ യുദ്ധവിമാനം അസമിൽ തകർന്നുവീണതായി സ്ഥിരീകരിച്ചു. സുഖോയ്–30 എംകെഐ (Su-30MKI) യുദ്ധവിമാനമാണ് തകർന്നുവീണത്. അസമിലെ ജോർഹട്ട് നഗരത്തിൽ നിന്ന് ഏകദേശം 60 കിലോമീറ്റർ അകലെയുള്ള പ്രദേശത്താണ് വിമാനം അപകടത്തിൽപ്പെട്ടത്. പൈലറ്റിനായുള്ള തെരച്ചിൽ തുടരുന്നു. തെരച്ചിലിനിടെ വിമാനത്തിന്റെ ഒരു ഭാഗം കണ്ടെത്തിയിരുന്നു. ഈ ഭാഗം പൂർണ്ണമായി കത്തിനശിച്ച നിലയിലാണ്. വിമാനം റഡാറിൽ നിന്ന് അപ്രത്യക്ഷമായതിനെ തുടർന്ന് തിരച്ചിൽ പ്രവർത്തനം ആരംഭിച്ചിരുന്നുവെന്നും, ഇപ്പോൾ അപകടം സംഭവിച്ചതായി സ്ഥിരീകരിച്ചെന്നും ഇന്ത്യൻ വ്യോമസേന അറിയിച്ചു.
രാത്രി 7.42-നാണ് വിമാനവുമായി അവസാനമായി ബന്ധപ്പെടാനായതെന്ന് വ്യോമസേന ‘എക്സ്’ പ്ലാറ്റ്ഫോമിൽ പങ്കുവെച്ച കുറിപ്പിൽ വ്യക്തമാക്കി. അപകടത്തിന്റെ സാഹചര്യങ്ങളും പൈലറ്റുമാരുടെ നിലയും സംബന്ധിച്ച കൂടുതൽ വിവരങ്ങൾ ഇതുവരെ പുറത്തുവിട്ടിട്ടില്ല. സംഭവസ്ഥലത്ത് രക്ഷാപ്രവർത്തനവും തിരച്ചിലും പുരോഗമിക്കുകയാണ്.
