ഹൈദരാബാദ്: കേരളത്തിലെ ശബരിമല വാര്ത്തകളില് ഈയിടെ നിറഞ്ഞത് സ്വര്ണ്ണക്കൊള്ള കാരണമാണ്. പക്ഷെ കേരളത്തിന് പുറത്തുള്ളവര് മലയാളികളേക്കാള് അയ്യപ്പഭക്തിയുള്ളവരാണെന്ന് പലപ്പോഴും തോന്നിപ്പോകാറുണ്ട്. അവരുടെ വ്രതാനുഷ്ടാനങ്ങള്, ശരണമന്ത്രങ്ങള് എന്നിവയില് ഒരു പ്രത്യേക ഊര്ജ്ജം പലപ്പോഴും കാണാം. ഇപ്പോഴിതാ തെലുങ്കിലെ സൂപ്പര്സ്റ്റാറായ രാം ചരണ് ശബരിമലയുടെ പേരില് വാര്ത്തകളില് നിറയുന്നു.
കൊട്ടിഘോഷിക്കപ്പെട്ട വിവാഹമായിരുന്നു വിജയ് ദേവരക്കൊണ്ടയുടേയും രശ്മിക മന്ദനയുടെയും. ഇരുവരും തെലുങ്കിലെ യുവ സൂപ്പര് സ്റ്റാറുകള്. വര്ഷങ്ങള് നീണ്ട ഇവരുടെ പ്രണയത്തിനൊടുവില് ഇതാ ഇരുവരുടെയും വിവാഹവും കഴിഞ്ഞു. കഴിഞ്ഞ ദിവസം വിവാഹ റിസപ്ഷന് ചടങ്ങുകള് നടന്നു.
ആ ചടങ്ങിന് തെലുങ്ക് സൂപ്പര് സ്റ്റാര് രാം ചരണ് എത്തിയിരുന്നു. പക്ഷെ ശബരിമല ദര്ശനത്തിന് പോകാനുള്ള കഠിനമായ വ്രതത്തിലാണ് രാം ചരണ്. അതുകൊണ്ട് എന്താണുണ്ടായതെന്നോ?ചെരിപ്പിടാതെ നഗ്നപാദനായാണ് അദ്ദേഹം ഈ വിവാഹസ്വീകരണച്ചടങ്ങില് പങ്കെടുക്കാനെത്തിയത്. അതും അയ്യപ്പഭക്തന്റെ കറുപ്പ് വസ്ത്രങ്ങളും അണിഞ്ഞ്.
കുഞ്ഞുങ്ങള് പിറന്നത് 14 വര്ഷത്തെ കാത്തിരിപ്പിനൊടുവില്, പിന്നില് അയ്യപ്പാനുഗ്രഹം
ആരാണ് രാം ചരണിന്റെ ഭാര്യ എന്നറിയാമോ? പ്രമുഖ ആശുപത്രി ശൃംഖലയായ അപ്പോളോ ഹോസ്പിറ്റലിന്റെ ഉടമകളില് ഒരാളായ ഉപാസന കാമിനേനി കോണ്ടിനേല. 1130 കോടിയുടെ വ്യക്തിപരമായ സ്വത്തിന് ഉടമയായ ഉപാസന കാമിനേനി അപ്പോളോ ലൈഫ് എന്ന പേരില് ഒരു സ്ഥാപനവും നടത്തുന്നു.അപ്പോളോ ആശുപത്രി ഉടമ പ്രതാപ് റെഡ്ഡിയുടെ പേരക്കുട്ടിയാണ് ഉപാസന. അദ്ദേഹത്തിന്റെ 70,000ല് പരം കോടിയുടെ ആസ്തിയിലും ഉപാസനയ്ക്ക് ഉടമസ്ഥപങ്കാളിത്തമുണ്ട്. 2012ലാണ് രാം ചരണും ഉപാസന കാമിനേനിയും വിവാഹിതരാകുന്നത്. പക്ഷെ 14 വര്ഷത്തെ കാത്തിരിപ്പിനൊടുവില് 2026ലാണ് ഇവര്ക്ക് കുഞ്ഞ് ജനിച്ചത്. ജനിച്ചപ്പോള് ഒന്നല്ല, രണ്ട് കുഞ്ഞുങ്ങള് ഉണ്ടായി. ഒരു ആണും ഒരു പെണ്ണും. ശബരിമല അയ്യപ്പന്റെ അനുഗ്രഹവും ഈ ശിശുപ്പിറവിയ്ക്ക് പിന്നിലുണ്ട്. തെലുഗു സൂപ്പര് സ്റ്റാര് ചിരഞ്ജീവിയുടെ മകന് കൂടിയാണ് സൂപ്പര് സ്റ്റാര് രാം ചരണ്.
