ബെംഗളൂരു: തട്ടുദോശ കഴിക്കാനായി പോയ 31കാരനെ നിസാര കാര്യത്തിന് കുത്തിക്കൊന്ന് അക്രമികള്. ബെംഗളൂരു ബസവേശ്വര നഗറിലെ തിമ്മയ്യ റോഡിലെ ശ്രീ രാഘവേന്ദ്ര വെജ് ദോശ കോര്ണറിലാണ് സംഭവം. കടയില് വച്ച് ദോശ കഴിക്കാനെത്തിയ ഒരാളുടെ കാലില് ചവിട്ടിയെന്ന കാര്യത്തിന്റെ പേരിലാണ് കൊലപാതകം.
മഞ്ജുനാഥ് നഗര് സ്വദേശി ശശികുമാര് ആണ് കൊല്ലപ്പെട്ടത്. സംഭവത്തിന് ശേഷം ഒളിവില് പോയ സഹോദരങ്ങളായ ഭാഗ്യരാജ്, മഞ്ജുനാഥ് എന്നിവര്ക്കായി പോലീസ് തിരച്ചില് ഊര്ജിതമാക്കി. സ്വകാര്യ ലോണ് റിക്കവറി സ്ഥാപനത്തിലെ ജീവനക്കാരനായിരുന്നു ശശികുമാര്. കുടുംബത്തോടൊപ്പം മഞ്ജുനാഥ് നഗറിലായിരുന്നു താമസം. രാത്രി ദോശ കഴിക്കാനാണ് ശശികുമാര് അടുത്തുള്ള തട്ടുകടയിലെത്തിയത്. ഇതേസമയം മഞ്ജുനാഥും ഇവിടെയുണ്ടായിരുന്നു.
ദോശ കഴിക്കുന്നതിനിടെ ശശികുമാര് അബദ്ധത്തില് മഞ്ജുനാഥിന്റെ കാലില് ചവിട്ടി. ഇതേച്ചൊല്ലി ഇരുവരും തമ്മില് വാക്കുതര്ക്കമുണ്ടായി. തര്ക്കം രൂക്ഷമായതോടെ മഞ്ജുനാഥ്, സഹോദരന് ഭാഗ്യരാജിനെ ഫോണില് വിളിച്ച് വരുത്തി. കത്തിയുമായി എത്തിയ ഭാഗ്യരാജ് ശശികുമാറിനെ പെട്ടെന്ന് ആക്രമിക്കുകയായിരുന്നു. പ്രതികള് ആയുധം ഉപയോഗിച്ച് ശശികുമാറിന്റെ കഴുത്തില് വെട്ടുകയായിരുന്നു. ഗുരുതരമായി പരിക്കേറ്റ ശശികുമാര് സംഭവസ്ഥലത്ത് വെച്ച് തന്നെ മരിച്ചു. പിന്നീട് പോലീസെത്തി മൃതദേഹം പോസ്റ്റ്മോര്ട്ടത്തിനായി മാറ്റി.
കൊല്ലപ്പെട്ട ശശികുമാറിന് 11 മാസം പ്രായമുള്ള ഒരു കുഞ്ഞുണ്ട്. ഭാര്യ പ്രസവശുശ്രൂഷയ്ക്കായി സ്വന്തം വീട്ടിലായതിനാല്, രാത്രി ഭക്ഷണം കഴിക്കാനാണ് ശശികുമാര് തട്ടുകടയിലെത്തിയത്.
