കണ്ണൂര്: ആരോഗ്യമന്ത്രി വീണാ ജോര്ജിനെ വധിക്കാന് ശ്രമിച്ചെന്ന കേസില് റിമാന്ഡിലുളള കെഎസ്യു പ്രവര്ത്തകരുടെ ജാമ്യാപേക്ഷയില് കണ്ണൂര് ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതി തിങ്കളാഴ്ച വിധി പറയും. ജാമ്യാപേക്ഷയില് ഇന്ന് കോടതി വിശദമായി വാദം കേട്ടു.
കരിങ്കൊടി പ്രതിഷേധം മാത്രമാണ് ഉണ്ടായതെന്നും കേസില് ചുമത്തിയ വധശ്രമം നിലനില്ക്കില്ലെന്നും പ്രതിഭാഗം വാദിച്ചു. ആരോഗ്യ നില മോശമായതിനാല് മൊഴിയെടുക്കാനാകാത്ത മന്ത്രി ചാനലുകളില് സംസാരിക്കുന്നുണ്ടെന്നും ചൂണ്ടിക്കാട്ടി.മന്ത്രിയെ അപായപ്പെടുത്താന് ശ്രമിച്ചു എന്ന് പറയുന്നവര്ക്ക് അതിനുപയോഗിച്ച ആയുധം കണ്ടെത്താനോ എന്ത് ആയുധം ഉപയോഗിച്ചെന്ന് തെളിയിക്കാനോ സാധിച്ചിട്ടില്ലന്നും പ്രതിഭാഗം കോടതിയില് വാദിച്ചു.
എന്നാല്, കൂടുതല് സിസിടിവി ദൃശ്യങ്ങള് പരിശോധിക്കേണ്ടതുണ്ടെന്നും കൂടുതല് പേര് കൃത്യത്തില് പങ്കെടുത്തിട്ടുണ്ടെന്നും പ്രോസിക്യൂഷന് കോടതിയില് പറഞ്ഞു. ചെറിയ ആയുധമാകാം പ്രതികള് പ്രയോഗിച്ചത്. അത്തരത്തിലുളള സമ്മര്ദ്ദം കഴുത്തില് ഉണ്ടായെന്നും പ്രോസിക്യൂഷന് ചൂണ്ടിക്കാട്ടി. പ്രതികളെ കസ്റ്റഡിയില് വേണമെന്നും പ്രോസിക്യൂഷന് ആവശ്യപ്പെട്ടു.തുടര്ന്ന് മന്ത്രിയുടെ മെഡിക്കല് റിപ്പോര്ട്ട് കോടതി ആവശ്യപ്പെട്ടു.
KSU
