തിരുവനന്തപുരം:മലങ്കര സഭ ഭിന്നിക്കരുതെന്ന നിലപാടാണ് പ്രധാനമന്ത്രിയുടേതെന്നും അത് സ്വാഗതാര്ഹം ആണെന്നും ഓര്ത്തഡോക്സ് സഭ.ദല്ഹിയില് നല്ല ചര്ച്ചയാണ് നടന്നതെന്നും സഭാ അധ്യക്ഷന് മാര്ത്തോമാ മാത്യൂസ് തൃതീയന് കാതോലിക്കാ ബാവ പ്രതികരിച്ചു.
സഭാതര്ക്കത്തിലെ 1958, 1995, 2017 കോടതി വിധികളെല്ലാം ഇക്കാര്യമാണ് പറയുന്നത്.വട്ടശേരില് തിരുമേനിയുടെ കാലം മുതല് മലങ്കര സഭയുടെയും നിലപാട് ഇതു തന്നെയാണ്. ഒന്നായി മുന്നോട്ട് പോകണമെന്ന നിലപാട് മലങ്കര സഭ കേന്ദ്ര – സംസ്ഥാന സര്ക്കാരുകളെ അറിയിച്ചിട്ടുണ്ട്-കാതോലിക്കാ ബാവ പറഞ്ഞു.
പൗരാണിക പാരമ്പര്യമുള്ള യഥാര്ത്ഥ ഭാരതീയ സഭയെന്നാണ് ബിജെപിയും ആര്എസ്എസും സഭയെ വിശേഷിപ്പിക്കുന്നത്.ഭാഗിക്കണമെന്ന ആവശ്യം പ്രധാനമന്ത്രി അംഗീകരിക്കുമെന്ന് കരുതുന്നില്ല. മലങ്കര സഭയുടെ അസ്തിത്വത്തിനെതിരെ ആരും നിലപാട് സ്വീകരിക്കില്ല.നിഖ്യാ സുന്നഹദോസ് വിളിച്ചു കൂട്ടിയ കുസ്തന്തീനോസ് ചക്രവര്ത്തിയും സഭകളുടെ യോജിപ്പാണ് ചര്ച്ച ചെയ്തത്.സ്വത്വവും സത്യവും മനസിലാക്കിയാല് മാത്രം മതി സഭാ സമാധാനത്തിനെന്നും കാതോലിക്കാ ബാവാ പറഞ്ഞു.
യാക്കോബായ സഭ നേതൃത്വവുമായുള്ള ചര്ച്ചയില് അഭിമാനമുണ്ടെന്ന് പ്രധാനമന്ത്രി നരേന്ദ്ര മോദി പ്രതികരിച്ചിരുന്നു.മോര് ഇഗ്നാത്തിയോസ് അപ്രേം ദ്വിതീയനെ നേരില് കാണാന് സാധിച്ചതില് ഏറെ അഭിമാനമുണ്ടെന്നും കൂടിക്കാഴ്ചയില് വിവിധ വിഷയങ്ങള് ചര്ച്ചയായെന്നും മോദി എക്സില് മലയാളത്തില് കുറിച്ചു.
‘അന്ത്യോഖ്യയുടെയും കിഴക്കന് പ്രദേശങ്ങളുടെയും പാത്രിയര്ക്കീസും, ആകമാന സുറിയാനി ഓര്ത്തഡോക്സ് സഭയുടെ പരമാധ്യക്ഷനുമായ പരിശുദ്ധ മോറാന് മോര് ഇഗ്നാത്തിയോസ് അപ്രേം ദ്വിതീയനെ നേരില് കാണാന് സാധിച്ചതില് ഏറെ അഭിമാനിക്കുന്നു. വിവിധ വിഷയങ്ങളില് ഞങ്ങള് സമഗ്രമായ ചര്ച്ച നടത്തി’ – മോദി കുറിച്ചു.
