തിരുവനന്തപുരം: ന്യൂയോര്ക്കില് നടക്കുന്ന ഐക്യരാഷ്ട്രസഭയുടെ കമ്മിഷന് ഓണ് സ്റ്റാറ്റസ് ഓഫ് വിമെന് സമ്മേളനത്തില് ഭാരതീയ മസ്ദൂര് സംഘം മുന് ദേശീയ അധ്യക്ഷന് സജി നാരായണന് പങ്കെടുക്കും.
15 ദിവസം നീണ്ടുനില്ക്കുന്ന കമ്മിഷന്റെ നടപടിക്രമങ്ങളിലും, അതിനോടനുബന്ധമായി നടക്കുന്ന അന്തര്ദേശീയ സമ്മേളനത്തിലും, സെമിനാറുകളിലും അദ്ദേഹം ക്ഷണിക്കപ്പെട്ട അതിഥിയായിട്ടാണ് പങ്കെടുക്കന്നത്. ലോകരാജ്യങ്ങളില് നിന്നുള്ള സര്ക്കാര് പ്രതിനിധികള്, ഐക്യരാഷ്ട്രസഭയുടെ അനുബന്ധ സംഘടനകളിലെ അംഗങ്ങള്, സര്ക്കാരിതര സംഘടനകള് എന്നിവരാണ് ക്ഷണിക്കപ്പെട്ട പ്രതിനിധികള്. സജി നാരായണനെ കൂടാതെ രാജ്യത്തിന്റെ വിവിധ ഭാഗങ്ങളില് നിന്നുള്ള വ്യത്യസ്ത വിഷയങ്ങളില് വിദഗ്ധരായ മുംബൈയിലെ ‘രാംഭാവു മാല്ഗി പ്രബോധിനി’യുടെയും, ‘ഭാരതീയ സ്ത്രീശക്തി’യുടെയും പ്രവര്ത്തനങ്ങളിലുള്ള മറ്റ് പത്ത് പ്രമുഖരുമാണ് പ്രതിനിധി സംഘത്തിലുള്ളത്.
അമേരിക്കയിലെ ഭാരത എംബസിയുടെ ആഭിമുഖ്യത്തില് നടക്കുന്ന സെമിനാറുകളിലും, പ്രവാസി ഭാരതീയരുടെയും, മലയാളി സംഘടനകളുടെയും പരിപാടികളിലും സജി നാരായണന് പങ്കെടുക്കും. മാര്ച്ച് 4ന് അദ്ദേഹം പുറപ്പെടുമെന്ന് ബിഎംഎസ് സംസ്ഥാന ജനറല് സെക്രട്ടറി ജി.കെ. അജിത് അറിയിച്ചു.
