പത്തനംതിട്ട: ശബരിമല സ്വര്ണക്കൊള്ള കേസില് ജയിലിലായവരെ കൂടാതെ അഞ്ച് പ്രതികളെ കൂടി അറസ്റ്റ് ചെയ്യാനുണ്ടെന്ന് ജനുവരി 19ന് എസ്ഐടി മേധാവി എഡിജിപി എച്ച്. വെങ്കിടേശ്, അന്വേഷണ ഉദ്യോഗസ്ഥന് ശശിധരന്, ചീഫ് വിജിലന്സ് ആന്ഡ് സെക്രൂരിറ്റി ഓഫീസര് എന്നിവര് ഹൈക്കോടതിയെ അറിയിച്ചിട്ടും ഈ അഞ്ച് പ്രതികളും ഇപ്പോഴും സുരക്ഷിതര്.
എസ്ഐടി കോടതിയെ അറിയിച്ച അഞ്ച് പ്രതികളില് രണ്ട് പേര് മുന് ദേവസ്വം മന്ത്രി കടകംപള്ളിയും മുന് ദേവസ്വം ബോര്ഡ് പ്രസിഡന്റ് പി.എസ്. പ്രശാന്തുമാണെന്നാണ് സൂചന. എന്നാല് കോടതിയെ ധരിപ്പിച്ചതില് ഒരാളെ പോലും 35 ദിവസം കഴിഞ്ഞിട്ടും എസ്ഐടി അറസ്റ്റ് ചെയ്യാത്തതില് ദുരൂഹതയേറെ.
കടകംപള്ളിക്ക് കേസില് പങ്കുണ്ടെന്ന കാര്യം വ്യക്തമാക്കുന്ന മൂന്ന് പ്രധാന മൊഴികളാണുള്ളത്. പാളികള് സ്വര്ണംപൂശാന് തന്നെ സ്പോണ്സര് ആക്കണമെന്ന് കാട്ടി ഒന്നാം പ്രതി ഉണ്ണികൃഷ്ണന് പോറ്റി ദേവസ്വം മന്ത്രിക്ക് കത്തുനല്കിയിരുന്നു എന്ന മുന് ദേവസ്വം ബോര്ഡ് പ്രസിഡന്റ് എ. പത്മകുമാറിന്റെ മൊഴി, സര്ക്കാര് സമ്മര്ദത്തിലാണ് പാളികള് കൊടുത്തുവിടാന് നിര്ബന്ധിതരായതെന്ന പത്മകുമാറിന്റെ തന്നെ മൊഴി, ഇത് രണ്ടും ശരിവച്ചുകൊണ്ടുള്ള ഉണ്ണിക്കൃഷ്ണന് പോറ്റിയുടെ മൊഴി. എന്നിട്ടും കടകംപള്ളിയെ അറസ്റ്റ് ചെയ്യാന് എസ്ഐടി തയാറാകാത്തത്ത് സര്ക്കാര് സമ്മര്ദം മൂലമാണെന്നാണ് സൂചന.
2019ലെ സ്വര്ണക്കൊള്ളയുടെ തുടര്ച്ചയാണ് 2025ല് നടന്നതെന്ന് എസ്ഐടി തന്നെ വ്യക്തമാക്കിയിരുന്നു. പി.എസ്. പ്രശാന്ത് അധികാരമേറ്റ ഉടന് ദ്വാരപാലക പാളികള് ചെന്നൈക്ക് കടത്താന് ശ്രമം ആരംഭിച്ചത് സംശയാസ്പദമായിരുന്നു. ഹൈക്കോടതി നിയമിച്ച സ്പെഷല് കമ്മിഷണറെ വിവരമറിയിക്കാതെ കഴിഞ്ഞ സപ്തംബര് 7ന് രാത്രി തിരുവോണ പൂജ കഴിഞ്ഞ് നട അടച്ചപ്പോള് അതീവ രഹസ്യമായാണ് ദ്വാരപാലക പാളികള് കടത്തിയത്. എന്നിട്ടും പിഎസ്. പ്രശാന്തിനെ അറസ്റ്റ് ചെയ്യാത്തതെന്തെന്നതും പ്രസക്തം.
പ്രശാന്തിന്റെ ഫോണ് രേഖകള് പോലും ഇതുവരെ പരിശോധിച്ചിട്ടില്ല. സിപിഎം ഉന്നതനായ കടകംപള്ളിയേയും പി.എസ്. പ്രശാന്തിനെയും അറസ്റ്റ് ചെയ്താല് സര്ക്കാരിന്റെ അടിത്തറ ഇളകുമെന്ന കാര്യം വ്യക്തമാണ്.
ജന്മഭൂമി ഓണ്ലൈന്