തിരുവനന്തപുരം: ശമ്പളകുടിശിക ലഭിക്കാത്തതിനെ തുടര്ന്ന് സംസ്ഥാനത്തെ മെഡിക്കല് കോളജുകളില് ഡോക്ടര്മാരുടെ സമരം തുടരും. ഇന്നലെ ആരോഗ്യമന്ത്രി വീണാ ജോര്ജുമായി നടത്തിയ ചര്ച്ച പരാജയപ്പെട്ടതോടെയാണ് ഒപി, അധ്യാപന ബഹിഷ്കരണവും അടിയന്തര പ്രാധാന്യമില്ലാത്ത ശസ്ത്രക്രിയകളും നിര്ത്തിയതും തുടരാന് തീരുമാനിച്ചത്. ഇതോടെ ശസ്ത്രക്രിയക്കായി കാത്തിരിക്കുന്നവരുള്പ്പെടെ ലക്ഷക്കണക്കിന് രോഗികള് ദുരിതത്തിലായി.
ഒപി, അധ്യാപന ബഹിഷ്കരണം നടത്തിയിട്ടും സര്ക്കാര് അനങ്ങാപ്പാറ നയം സ്വീകരിച്ചതോടയാണ് അടിയന്തരമല്ലാത്ത ശസ്ത്രക്രിയകളില് നിന്ന് ഡോക്ടര്മാര് വിട്ടുനില്ക്കല് ആരംഭിച്ചത്. ഇന്നലെ ആരോഗ്യമന്ത്രിയുമായി ചര്ച്ച നടത്തിയെങ്കിലും ഫലമുണ്ടായില്ല. ശമ്പളകുടിശിക ഉള്പ്പെടെയുള്ള ആവശ്യങ്ങള് ന്യായമാണെങ്കിലും സാമ്പത്തിക പ്രതിസന്ധി കാരണം അനുവദിക്കാന് പണമില്ലെന്നാണ് മന്ത്രി പറഞ്ഞത്. ഇതോടെ സമരം തുടരാന് ഡോക്ടര്മാര് തീരുമാനിക്കുകയായിരുന്നു. മെഡിക്കല് കോളജുകളില് ഡോക്ടര്മാര് ഇല്ലാത്തതിനാല് ഒപിയിലെത്തുന്ന രോഗികള് വലിയ ദുരിതത്തിലാണ്. പിജി വിദ്യാര്ത്ഥികളാണ് രോഗികളെ പരിശോധിക്കുന്നത്. ഡോക്ടര്മാരുടെ സമരം കാരണം വിദ്യാര്ഥികളുടെ പഠനവും മുടങ്ങി. നിലവില് കാഷ്വാലിറ്റി, ലേബര് റൂം, ഐസിയു അടക്കമുള്ളവയെ സമരത്തില് നിന്ന് ഒഴിവാക്കിയിട്ടുണ്ട്. അതേസമയം ഫെബ്രുവരി 26 മുതല് എല്ലാ പരീക്ഷാ ജോലികളില് നിന്ന് വിട്ടുനില്ക്കും. വരുംദിവസങ്ങളില് സമരം കൂടുതല് ശക്തമാക്കാനാണ് ഡോക്ടര്മാരുടെ തീരുമാനം.
