കൊച്ചി: മധ്യകേരളത്തില് തിരഞ്ഞെടുപ്പ് പോരാട്ടത്തിന് തുറക്കം കുറിച്ച് എന്ഡിഎയുടെ ഓഫീസ് ത്രിക്കാക്കരയിൽ കേന്ദ്രമന്ത്രി കിരണ് റിജിജു ഉദ്ഘാടനം ചെയ്തു. ട്വന്റി ട്വന്റിയുടെ വരവോടെ മധ്യകേരളത്തില് എന്ഡിഎയുടെ കരുത്ത് ഗണ്യമായി വർദ്ധിച്ചിട്ടുണ്ട്. ബിഡിജെഎസിന്റെ പ്രവര്ത്തനം കൂടുതല് ശക്തമാക്കാന് ആലപ്പുഴയിലും എന്ഡിഎ പ്രത്യേക ഓഫീസ് തുറക്കും.
ഉച്ചയ്ക്ക് രണ്ട് മണിയോടെ കാക്കനാട് സിറോ മലബാര് സഭാ ആസ്ഥാനമായ സെന്റ് തോമസ് മൗണ്ടിലെത്തി സഭാ മേലധ്യക്ഷന്മാരുമായി കൂടിക്കാഴ്ച്ച നടത്തും. വഖഫ് ഭേദഗതി ബില് പാര്ലമെന്റ് പാസാക്കിയശേഷം മുനമ്പത്തുനടന്ന ആഹ്ളാദപ്രകടനത്തില് പങ്കെടുത്തു മടങ്ങിയ കേന്ദ്രമന്ത്രി കിരണ് റിജിജു വീണ്ടും കൊച്ചിയിലെത്തുമ്പോള് മുനമ്പം ഭൂമി പ്രശ്നവും വീണ്ടും ചര്ച്ചയാകും.
ഹൈക്കോടതി ഡിവിഷന് ബെഞ്ചിന്റെ അനുകൂലവിധിയെത്തുടര്ന്ന് മുനമ്പത്തുകാര് കരം അടച്ചു. ഭൂസംരക്ഷണസമിതി സമരം അവസാനിപ്പിച്ചിരുന്നു. ട്രൈബ്യൂണലിന്റെ അന്തിമവിധിക്കായി കാത്തിരിക്കുകയാണ്. എന്നാല് ബിജെപി ന്യൂനപക്ഷമോര്ച്ചയുടെ പിന്തുണയോടെ മറ്റൊരുസമരം തുടരുന്നുണ്ട്. ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് അടക്കം നേതാക്കള് വൈകീട്ട് മുനമ്പത്തെത്തി ഈ സമരത്തിന് പിന്തുണ പ്രഖ്യാപിക്കും.
