ഹൈദരാബാദ്: മുസ്ലിം ജീവനക്കാരുടെ പ്രവര്ത്തി സമയത്തില് തെലങ്കാന സര്ക്കാര് പ്രത്യേക ഇളവ് പ്രഖ്യാപിച്ചു. വൈകിട്ട് 4ന് മുസ്ലിം ജീവനക്കാര്ക്ക് തൊഴില് അവസാനിപ്പിക്കാമെന്നാണ് പൊതുഭരണ വകുപ്പ് ഇറക്കിയ ഉത്തരവ്. റംസാന് വ്രതത്തോടനുബന്ധിച്ച് മുസ്ലിങ്ങളുടെ പ്രീതി പിടിച്ചുപറ്റുന്നതിനായാണ് സംസ്ഥാന സര്ക്കാരിന്റെ ഈ പ്രഖ്യാപനം.
സര്ക്കാര് വകുപ്പുകളിലേയും പൊതുമേഖലാ സ്ഥാപനങ്ങളിലേയും ജീവനക്കാര്, അദ്ധ്യാപകര്, കരാര് ജീവനക്കാര് തുടങ്ങിയവര്ക്കാണ് ജോലി സമയം ഒരു മണിക്കൂര് മുമ്പ് ഓഫീസ് വിടുന്നതിന് അനുമതിയുള്ളത്. ജീവനക്കാര്ക്ക് നിസ്കാരം നടത്തുന്നതിനും കൃത്യസമയത്ത് നോമ്പ് അവസാനിപ്പിക്കുന്നതിനുമാണ് ഇളവെന്നാണ് സര്ക്കാര് പ്രതികരിച്ചത്. ഫെബ്രുവരി 19 മുതല് മാര്ച്ച് 20 വരെയാണ് ഇളവ്. സംസ്ഥാനത്തെ ഉറുദു മീഡിയം സ്കൂളുകളുടെ സമയവും പരിഷ്കരിച്ചിട്ടുണ്ട്. രാവിലെ 8.30 മുതല് ഉച്ചയ്ക്ക് 1.30 വരെയാണ് ക്ലാസുകള്.
തെലങ്കാന സര്ക്കാര് തീരുമാനം പ്രീണനമാണെന്നാരോപിച്ച് ബിജെപി രംഗത്തെത്തി. 41 ദിവസത്തെ അയ്യപ്പദീക്ഷ ആചരിക്കുന്ന ഹിന്ദുഭക്തര്ക്ക് സമാനമായ ഇളവുകള് നല്കാത്തത് എന്തുകൊണ്ടാണെന്ന് കേന്ദ്രമന്ത്രി ബന്ദി സഞ്ജയ് കുമാര് ചോദിച്ചു. ജനങ്ങള് എല്ലാവര്ക്കും അവകാശങ്ങള് നല്കണമെന്നും ബിജെപി ആവശ്യപ്പെട്ടു.
