കൊച്ചി : ശബരിമല അഭിഷേകം നടത്തിയ നെയ് തട്ടിപ്പില് പ്രാഥമിക റിപ്പോര്ട്ട് ഹൈക്കോടതിയില് സമര്പ്പിച്ച് വിജിലന്സ്. പ്രാഥമിക അന്വേഷണത്തില് 21 ലക്ഷത്തിന്റെ ക്രമക്കേടാണ് കണ്ടെത്തിയത്.
ക്ഷേത്രം സ്പെഷ്യല് ഓഫീസര്മാര് അടക്കം 33 പ്രതികളുണ്ട്. ക്ഷേത്ര പ്രസാദത്തിന്റെ കണക്കുകള് സൂക്ഷിക്കുന്നതില് ഹൈക്കോടതി അതിരൂക്ഷ വിമര്ശനമാണ് നടത്തിയത്.ഒരു പെട്ടി കടയില് ഇതിലും നന്നായി കണക്ക് സൂക്ഷിക്കുമെന്ന് കോടതി പറഞ്ഞു. കണക്കുകള് എഴുതി സൂക്ഷിക്കുന്നത് 200 പേജിന്റെ നോട്ട്ബുക്കിലെന്നും ബുക്കില് നിറയെ വെട്ടലും തിരുത്തലുമെന്നും കോടതി കുറ്റപ്പെടുത്തി.
13,679 പാക്കറ്റ് നെയ്യ് വിറ്റ വകയിലുള്ള പണം ദേവസ്വം ബോര്ഡിന്റെ അക്കൗണ്ടില് അടച്ചിട്ടില്ലെന്ന് കണ്ടെത്തിയ പശ്ചാത്തലത്തിലാണ് കോടതി അന്വേഷണത്തിന് ഉത്തരവിട്ടത്.എസ് പി മഹേഷ്കുമാറിന്റെ നേതൃത്വത്തിലുള്ള പ്രത്യേക സംഘത്തിനാണ് അന്വേഷണ ചുമതല.
അതിനിടെ, ശബരിമല സ്വര്ണ്ണക്കൊള്ളയില് അറസ്റ്റിലായ തന്ത്രി കണ്ഠരര് രാജീവരും ജയില് മോചിതനായി. ഒന്നാംപ്രതി ഉണ്ണികൃഷ്ണന് പോറ്റിയുമായി തന്ത്രി കണ്ഠരര് രാജീവര്ക്ക് അടുത്ത ബന്ധമുണ്ട് എന്നതടക്കമുള്ള പ്രോസിക്യൂഷന് വാദങ്ങള് തള്ളിയാണ് കൊല്ലം വിജിലന്സ് കോടതി ദ്വാരപാലക- കട്ടിള പാളി കേസുകളില് ജാമ്യം നല്കിയത് അറസ്റ്റിലായി നാല്പത്തിയൊന്നാം ദിവസമാണ് തന്ത്രി ജയിലിന് പുറത്തിറങ്ങിയത്.
