കോട്ടയം : ശബരിമല യുവതീ പ്രവേശന വിഷയത്തില് സംസ്ഥാന സര്ക്കാര് കോടതിയില് നിലപാട് തിരുത്തുമെന്നാണ് കരുതുന്നതെന്ന് എന്എസ്എസ് ജനറല് സെക്രട്ടറി ജി സുകുമാരന് നായര്. പഴയ വാശിയിലും ഉശിരിലും എന്എസ്എസ് കേസ് നടത്തും.
2019ല് സര്ക്കാര് ശരിയായി സത്യവാംഗ്മൂലം സമര്പ്പിച്ചിരുന്നെങ്കില് വലിയ പ്രശ്നങ്ങളിലേക്ക് പോകില്ലായിരുന്നുവെന്നും സുകുമാരന് നായര് മാധ്യമങ്ങളോട് പറഞ്ഞു.
യുവതീപ്രവേശവുമായി ബന്ധപ്പെട്ട ഹര്ജികള് തിങ്കളാഴ്ച കോടതി പരിഗണിക്കുമ്പോള് സംസ്ഥാന സര്ക്കാര് എന്ത് നിലപാട് സ്വീകരിക്കുമെന്ന് അറിയില്ല. നിലപാട് തിരുത്തുമെന്നാണ് പ്രതീക്ഷ. വിഷയത്തില് ശക്തമായി കേസിന് പോയ ഒരേയൊരു സംഘടന എന്എസ്എസാണ്. അതേ ഉശിരോടെ മുന്നോട്ടുപോകും- സുകുമാരന് നായര് പറഞ്ഞു..
ആഗോള അയ്യപ്പ സംഗമത്തില് ദേവസ്വം ബോര്ഡ് അനാവശ്യമായി പണം ചെലവാക്കിയെന്ന് ഇതുവരെ തെളിഞ്ഞിട്ടില്ലെന്ന അഭിപ്രായമാണ് സുകുമാരന് നായര്ക്ക്. ശബരിമലയുമായി ബന്ധപ്പെട്ട വിഷയങ്ങളില് പൊലീസ് അന്വേഷണം നടത്തുന്നുണ്ട്. കുറ്റവാളികള്ക്ക് തക്ക ശിക്ഷ ഉറപ്പാക്കണം. ശബരിമലയിലെ വിഷയങ്ങള് തിരഞ്ഞെടുപ്പിനെ ബാധിക്കുമോ എന്ന് ഇപ്പോള് പറയാനാകില്ലെന്നും അദ്ദേഹം പറഞ്ഞു.
