ഇൻസ്റ്റഗ്രാം റീലുകൾ നിരന്തരമായി ആസ്വദിക്കുന്നവർക്ക് പ്രിയപ്പെട്ടവരാണ് മിഥുൻ രമേശും, ഭാര്യ ലക്ഷ്മിയും. കോമഡി റീലുകൾ ചെയ്ത് തുടങ്ങിയതോടെയാണ് കൂടുതൽ ജനപ്രീതി ഇരുവർക്കും ലഭിച്ച് തുടങ്ങിയത്.. ചെയ്യുന്നത് കോമഡി റീലുകളാണെങ്കിലും അത് എടുക്കുന്നതിന് മുമ്പ് മൂന്നാല് തവണ അടി കഴിഞ്ഞിട്ടുണ്ടാവുമെന്ന് പറയുകയാണ് ലക്ഷ്മി ഇപ്പോൾ. ദി ക്യുവിന് നൽകിയ അഭിമുഖത്തിൽ മിഥുന് ബെൽസ് പാൾസി വന്ന സമയം എങ്ങനെയാണ് അതിജീവിച്ചതെന്നും ലക്ഷ്മി വെളിപ്പെടുത്തി.
‘ രണ്ട് വർഷം മുമ്പാണ് മിഥുന് ബെൽസ് പാൾസി രോഗം വന്നത്. പിന്നീട് കൃത്യമായ ചികിത്സയിലൂടെയും ഫിസിയോ തെറാപ്പിയിലൂടെയും സുഖം പ്രാപിക്കുകയായിരുന്നു. മിഥുൻ ചേട്ടന് ബെല്സ് പാള്സി വന്നപ്പോള് നന്നായി വിഷമിച്ചു. ആ പതിനഞ്ച് ദിവസം വല്ലാതെ വിഷമിച്ച സമയമായിരുന്നു. നമുക്ക് ഫിസിക്കലി കാണാൻ പറ്റുമല്ലോ മിഥുൻ ചേട്ടൻ അനുഭവിക്കുന്ന ബുദ്ധിമുട്ട്. വെള്ളം കുടിക്കുമ്പോൾ വായിൽ നിന്നും ഒരു വശത്ത് കൂടി ഡ്രിപ്പ് ചെയ്ത് പോവുന്നതൊക്കെ കാണുമ്പോൾ നമുക്ക് വല്ലാതെ വിഷമം വരും.
ഹെൽത്ത് ശ്രദ്ധിക്കാതെ പോകുകയെന്ന് പറഞ്ഞാൽ എനിക്ക് ഭയങ്കര ടെൻഷനാണ്. ഇമ്മ്യൂണിറ്റി കുറയുമ്പോഴാണ് ഇങ്ങനത്തെ അസുഖം വരുന്നത് എന്നാണ് ഞാൻ കരുതുന്നത്.എന്നെക്കൊണ്ട് ചെയ്യാൻ പറ്റുന്നത് ഒന്ന് ഫിസിയോതെറാപ്പിയാണ്. അത് ഞാൻ പഠിച്ചിട്ടുണ്ട്. പിന്നെ എനിക്ക് ചെയ്യാൻ പറ്റുന്നത് ദൈവത്തോട് പ്രാർത്ഥിക്കാം എന്നുള്ളതാണ്. അങ്ങനെ ഞാൻ പ്രാർത്ഥിച്ചിട്ട് ചെയ്തതാണ് തല മൊട്ടയടിച്ചത്. ആ വീഡിയോ ഞങ്ങൾ എവിടെയും പുറത്ത് വിട്ടിട്ടില്ല. ഫോട്ടോ മാത്രമെ ഇട്ടിട്ടുള്ളൂ.ഞാൻ പ്രാർത്ഥിച്ച് ഇരിക്കുമ്പോൾ പിറകിൽ ഇരുന്ന് ഭയങ്കര ചിരിയായിരുന്നു തൻവിയും മിഥുൻ ചേട്ടനും. അവർക്ക് എന്തൊരു സന്തോഷം ആയിരുന്നു എന്റെ മുടി എടുക്കുമ്പോൾ.
ഞങ്ങൾ തമ്മിൽ വീഡിയോ എടുക്കുമ്പോൾ അടിയുണ്ടാകാറുണ്ട്. അത് ചെയ്തത് ശരിയായില്ല, ഇത് ചെയ്തത് ശരിയായില്ല എന്നൊക്കെ ചിലപ്പോൾ മിഥുൻ ചേട്ടൻ പറയും. എനിക്കിങ്ങനെയേ ചെയ്യാൻ പറ്റൂവെന്നാകും എന്റെ മറുപടി. അങ്ങനെയുള്ള അടികളൊക്കെ ഉണ്ടാകും. രണ്ട് മൂന്ന് അടിയൊക്കെ കഴിഞ്ഞശേഷമുള്ള വീഡിയോയാകും നിങ്ങൾ കോമഡിയായി കാണുന്നത്.ഗിഫ്റ്റുകൾ കൊടുത്താൽ മാത്രമെ തൻവി റീലിലിൽ ഭാഗമാകാൻ വരൂ. അതിന് ഇപ്പോഴും ഒരു കുറവുമില്ല. ഇപ്പോഴും ഞങ്ങളെ ഊറ്റിയാണ് അവൾ ജീവിക്കുന്നത്. ‘ എന്നും ലക്ഷ്മി പറയുന്നു.
