ഇന്ത്യക്ക് വഴങ്ങി ട്രംപ്: യുഎസ് ഉല്പന്നങ്ങൾ ഇന്ത്യവാങ്ങുമെന്ന് ഉറപ്പില്ല, വാങ്ങാൻ ഉദ്ദേശിക്കുന്നു, ഇന്ത്യ ഡിജിറ്റൽ സേവന നികുതി നീക്കും എന്നവരി മാറ്റി

ഇന്ത്യയും അമേരിക്കയും തമ്മിലുള്ള വ്യാപാര കരാറിന്റെ വസ്തുതാ പത്രിക പുറത്തിറക്കി ഒരു ദിവസം പിന്നിടുമ്പോൾ, അതിലെ നിർണ്ണായക പദങ്ങളിലും വ്യവസ്ഥകളിലും വൈറ്റ് ഹൗസ് നിശബ്ദമായി മാറ്റം വരുത്തിയിട്ടുണ്ട്. നേരത്തെ അമേരിക്ക അവകാശപ്പെട്ടത് പോലെ ഇന്ത്യ അമേരിക്കക്ക് വഴങ്ങിയിട്ടില്ല എന്നതാണ് ഇതിലൂടെ തെളിയുന്നത്. 500 ബില്യൺ ഡോളറിലധികം മൂല്യമുള്ള യുഎസ് ഉൽപ്പന്നങ്ങൾ ഇന്ത്യ വാങ്ങുമെന്ന് “ഉറപ്പുനൽകി” (Commits) എന്ന വാക്കിന് പകരം, ഇന്ത്യ വാങ്ങാൻ “ഉദ്ദേശിക്കുന്നു” (Intends to buy) എന്നാക്കി മാറ്റിയതാണ് ഏറ്റവും ശ്രദ്ധേയമായ മാറ്റം.

കരാറിലെ ഏറ്റവും പ്രധാനപ്പെട്ട ഒരു ഘടകത്തിലാണ് ഇത്തരമൊരു മാറ്റം വരുത്തിയിരിക്കുന്നത്. വസ്തുതാ പത്രികയുടെ ആദ്യ പതിപ്പിൽ, “അമേരിക്കൻ ഊർജ്ജം, വിവരവിനിമയ സാങ്കേതികവിദ്യ, കൃഷി, കൽക്കരി തുടങ്ങിയ മേഖലകളിൽ നിന്ന് 500 ബില്യൺ ഡോളറിലധികം മൂല്യമുള്ള ഉൽപ്പന്നങ്ങൾ വാങ്ങാൻ ഇന്ത്യ പ്രതിജ്ഞാബദ്ധമാണ്” എന്നാണ് രേഖപ്പെടുത്തിയിരുന്നത്. എന്നാൽ വൈറ്റ് ഹൗസ് വെബ്‌സൈറ്റിൽ ഇപ്പോൾ ലഭ്യമായ പരിഷ്കരിച്ച പതിപ്പിൽ, ഇന്ത്യ കൂടുതൽ അമേരിക്കൻ ഉൽപ്പന്നങ്ങൾ വാങ്ങാൻ “ലക്ഷ്യമിടുന്നു” എന്നാണ് നൽകിയിരിക്കുന്നത്.

ചൊവ്വാഴ്ചയാണ് കരാറിലെ പ്രധാന നിബന്ധനകൾ വിവരിക്കുന്ന വസ്തുതാ പത്രിക വൈറ്റ് ഹൗസ് പുറത്തിറക്കിയത്. എല്ലാ യുഎസ് വ്യവസായ ഉൽപ്പന്നങ്ങളുടെയും വിപുലമായ കാർഷിക-ഭക്ഷ്യ ഉൽപ്പന്നങ്ങളുടെയും ഇറക്കുമതി നികുതി ഇന്ത്യ ഒഴിവാക്കുകയോ കുറയ്‌ക്കുകയോ ചെയ്യുമെന്ന് ഈ രേഖയിൽ വ്യക്തമാക്കിയിരുന്നു.മറ്റൊരു സുപ്രധാന മാറ്റം ഡിജിറ്റൽ സേവന നികുതിയുമായി ബന്ധപ്പെട്ടതാണ്. ഇന്ത്യ ഡിജിറ്റൽ സേവന നികുതികൾ നീക്കം ചെയ്യുമെന്ന് ആദ്യത്തെ വസ്തുതാ പത്രികയിൽ പറഞ്ഞിരുന്നു. കൂടാതെ ഡിജിറ്റൽ വ്യാപാരത്തിലെ തടസ്സങ്ങൾ നീക്കുന്നതിനായി ശക്തമായ ഉഭയകക്ഷി നിയമങ്ങൾ ചർച്ച ചെയ്യാൻ ഇന്ത്യ പ്രതിജ്ഞാബദ്ധമാണെന്നും വ്യക്തമാക്കിയിരുന്നു.

എന്നാൽ പുതിയ രേഖയിൽ “ഇന്ത്യ ഡിജിറ്റൽ സേവന നികുതികൾ നീക്കം ചെയ്യും” എന്ന വാചകം പൂർണ്ണമായും ഒഴിവാക്കി. പകരം ഡിജിറ്റൽ വ്യാപാര നിയമങ്ങൾ ചർച്ച ചെയ്യാൻ ഇന്ത്യ സമ്മതിച്ചു എന്ന് മാത്രമാണ് ഇപ്പോൾ രേഖപ്പെടുത്തിയിരിക്കുന്നത്. ഇരുരാജ്യങ്ങളും തമ്മിലുള്ള നയതന്ത്ര ചർച്ചകളുടെ പശ്ചാത്തലത്തിൽ ഇത്തരം മാറ്റങ്ങൾ ഏറെ പ്രാധാന്യത്തോടെയാണ് ലോകം വീക്ഷിക്കുന്നത്.

അതുപോലെ, ആദ്യ പതിപ്പിൽ ഉണക്കിയ ധാന്യങ്ങൾ, ചുവന്ന ചോളം, നട്‌സ്, പഴങ്ങൾ, ചില പയറുവർഗ്ഗങ്ങൾ (Certain Pulses), സോയാബീൻ ഓയിൽ, വൈൻ എന്നിവയുടെ നികുതി കുറയ്‌ക്കുന്നതിനെക്കുറിച്ച് പറഞ്ഞിരുന്നു. എന്നാൽ പുതിയ പതിപ്പിൽ നിന്ന് “ചില പയറുവർഗ്ഗങ്ങൾ” എന്ന ഭാഗം ഒഴിവാക്കിയിട്ടുണ്ട്. ഇത് കാർഷിക മേഖലയിലെ വ്യാപാര ചർച്ചകളിൽ വലിയ പ്രാധാന്യമുള്ള കാര്യമാണ്.