തിരുവനന്തപുരം: 15 വര്ഷങ്ങള്ക്കുശേഷം സംസ്ഥാനത്തെ ഹയര്സെക്കന്ഡറി പാഠപുസ്തകങ്ങള് പരിഷ്കരിക്കുന്നു. അടുത്ത അധ്യയനവര്ഷം 11-ാം ക്ലാസില് പുതുക്കിയ പുസ്തകങ്ങളാകും ലഭ്യമാകുകയെന്ന് പൊതുവിദ്യാഭ്യാസ വകുപ്പ് മന്ത്രി വി. ശിവന്കുട്ടി അറിയിച്ചു. സംസ്ഥാന കരിക്കുലം സ്റ്റിയറിംഗ് കമ്മിറ്റിയോഗം 41 ടൈറ്റില് പാഠപുസ്തകങ്ങള്ക്ക് അംഗീകാരം നല്കി. എല്ലാ ഭാഷാവിഷയങ്ങളും, കമ്പ്യൂട്ടര് സയന്സ്, ജേര്ണലിസം, ഗാന്ധിയന് സ്റ്റഡീസ്, ഹോം സയന്സ്, ഇലക്ട്രോണിക്സ് തുടങ്ങിയ വിഷയങ്ങളും ഇതില് ഉള്പ്പെടും. ആദ്യഘട്ടത്തില് എസ്.സി.ഇ.ആര്.ടി. യുടെ പുസ്തകങ്ങളാണ് പരിഷ്കരിക്കുന്നത്. എന്.സി.ഇ.ആര്.ടി.യുടെ 44 ടൈറ്റില് പാഠപുസ്തകങ്ങള് കൂടി ഹയര്സെക്കന്ഡറിയില് ഉപയോഗിക്കുന്നുണ്ട്. ഈ പാഠപുസ്തകങ്ങള് പുറത്തിറങ്ങിയശേഷം ഏത് രീതിയില് ഉള്ക്കൊള്ളണമെന്ന് തീരുമാനിക്കുമെന്നാണ് മന്ത്രി പറഞ്ഞത്. കഴിഞ്ഞ വര്ഷം എന്.സി.ഇ.ആര്.ടി. പാഠപുസ്തകങ്ങളില് നിന്ന് പാഠഭാഗങ്ങള് നീക്കം ചെയ്തപ്പോള് 4 വിഷയങ്ങളില് അഡീഷണല് പാഠപുസ്തകങ്ങള് കേരളം പ്രസിദ്ധീകരിച്ചിരുന്നു.
