ന്യൂദല്ഹി: തനിക്ക് താങ്ങും തണലുമായിരുന്ന, എന്നും എപ്പോഴും പ്രചോദനവും പ്രോത്സാഹനവും കരുത്തും നല്കിയ ഭര്ത്താവ് വി. ശ്രീനിവാസന്റെ ഓര്മ്മകളില് വിതുമ്പി ഒളിംപ്യന് പി.ടി. ഉഷ എംപി. ഇന്നലെ ന്യൂദല്ഹിയില് നടന്ന പ്രാര്ത്ഥനാസഭയില് സംസാരിക്കവെയാണ് ട്രാക്കില് കരുത്തയായ പി.ടി. ഉഷയ്ക്ക് മനസും കണ്ണും ഇടറിയത്.
ശ്രീനിയേട്ടന്റെ സ്വപ്നങ്ങള് നൂറുശതമാനം സാക്ഷാത്കരിക്കുമെന്ന് ഉഷ പറഞ്ഞു. മ്യൂസിയത്തിന്റെ നിര്മ്മാണം പൂര്ത്തിയായിട്ടില്ല. ഏഷ്യന് ഗെയിംസിനുശേഷം ആത്മകഥ പ്രകാശനം ചെയ്യണമെന്നാണ് തീരുമാനിച്ചിരുന്നത്. ഇതുരണ്ടും പൂര്ത്തിയാക്കും. ഉഷ സ്കൂള് ഓഫ് അത്ലറ്റിക്സില് നിന്ന് ഒളിംപിക് മെഡല് ശ്രീനിയേട്ടന്റെ സ്വപ്നമായിരുന്നു. അതിനുള്ള പരിശ്രമവും കൂടുതല് കരുത്തോടെ തുടരും. എന്നാല് മാത്രമേ അദ്ദേഹത്തിന് സന്തോഷമാകൂ, പി.ടി. ഉഷ പറഞ്ഞു. തനിക്ക് ഭര്ത്താവും ആത്മസുഹൃത്തുമായിരുന്നു.
എല്ലാ പ്രവര്ത്തനങ്ങള്ക്കും വഴികാട്ടിയും പിന്തുണച്ചും കൂടെ നിന്നു. തനിക്കും കുടുംബത്തിനും രാജ്യത്തിനും വേണ്ടി എല്ലാം ചെയ്തു. എപ്പോഴും കൂടെയുണ്ടാകുമെന്നുറപ്പാണെന്നും വിതുമ്പികൊണ്ട് ഉഷ പറഞ്ഞു. പ്രസംഗത്തിനിടെ പലപ്പോഴും വാക്കുകള് ഇടറി, കണ്ണീര്കണങ്ങള് പൊഴിഞ്ഞു. മകന് വിഘ്നേഷ് ഉജ്ജ്വലും ഉഷയ്ക്കൊപ്പമുണ്ടായിരുന്നു.
കേന്ദ്രമന്ത്രി ജോര്ജ് കുര്യന്, എംപിമാരായ സി. സദാനന്ദന് മാസ്റ്റര്, ജെബി മേത്തര്, ബിജെപി ദേശീയ ട്രഷറര് രാജേഷ് അഗര്വാള്, ബിജെപി ദല്ഹി സംസ്ഥാന പ്രസിഡന്റ് വീരേന്ദ്ര സച്ച്ദേവ, സുധാംശുമീത്തല്, എന്. വേണുഗോപാല്, ബാബു പണിക്കര് തുടങ്ങിയവരും കായികതാരങ്ങളും ഇന്ത്യന് ഒളിംപിക് അസോസിയേഷന്, വിവിധ സ്പോര്ട്സ് അസോസിയേഷന് ഭാരവാഹികളും പങ്കെടുത്തു. ദേശീയ കബഡി താരവും സിഐഎസ്എഫ് ഡിവൈഎസ്പിയുമായിരുന്ന വി. ശ്രീനിവാസന് കഴിഞ്ഞ 30നാണ് അന്തരിച്ചത്.
