ലക്നൗ: വിവാഹ ദിവസം തന്നെ യുവതി കുഞ്ഞിന് ജന്മം നൽകി. റാംപുർ ജില്ലയിലെ കുംഹാരിയ ഗ്രാമത്തിലാണ് സംഭവം. വിവാഹ ചടങ്ങുകൾ കഴിഞ്ഞ് വരനും സംഘവും മടങ്ങുന്നതിന് മുമ്പ് തന്നെ നവവധു പ്രസവിക്കുകയായിരുന്നു. കുംഹാരിയയിൽ താമസിക്കുന്ന റിസ്വാനും അയൽഗ്രാമത്തെ യുവതിയു തമ്മിലുള്ള വിവാഹത്തിനിടെയാണ് സംഭവം.
നാളുകൾ നീണ്ട പ്രണയത്തിനുശേഷമാണ് ഇരുവരും വിവാഹിതരായത്. വിവാഹത്തിന് മുമ്പ് ഇരുവരും അടുത്ത ബന്ധത്തിലുണ്ടായിരുന്നെന്നും, തുടർന്ന് കുടുംബങ്ങൾ ഇടപെട്ട് ആചാരപ്രകാരം വിവാഹം നടപ്പാക്കപ്പെട്ടതായും റിപ്പോർട്ടുകളുണ്ട്. യുവതിയുടെ ബന്ധുക്കൾ പൊലീസിനെ സമീപിച്ചതിനുശേഷം ഗ്രാമമുഖ്യന്റെ ഇടപെടലിലൂടെ വിവാഹം നിശ്ചയിക്കപ്പെട്ടുവെന്നും വിവരം പറയുന്നു.
വിവാഹ ആഘോഷങ്ങൾക്കായി റിസ്വാനും ബന്ധുക്കളും വധുവിന്റെ ഗ്രാമമായ ബഹാദൂർഗഞ്ചിലേക്ക് എത്തുകയായിരുന്നു. ആചാരപ്രകാരം ചടങ്ങുകൾ പൂർത്തിയാക്കിയ ശേഷം വധുവിനൊപ്പം വരന്റെ വീട്ടിലേക്ക് മടങ്ങിയപ്പോഴാണ് യുവതിക്ക് പ്രസവവേദന ആരംഭിച്ചത്. തുടർന്ന് ആശുപത്രിയിൽ ചികിത്സ തേടി. ആശുപത്രിയിൽവെച്ച് യുവതിക്ക് ഒരു പെൺകുഞ്ഞ് ജനിച്ചു.
