കോഴിക്കോട്: പ്രസിദ്ധമായ അങ്ങാടിപ്പുറം തളി മഹാദേവക്ഷേത്രം പിടിച്ചെടുക്കാനുള്ള ശ്രമവുമായി വീണ്ടും മലബാര് ദേവസ്വം ബോര്ഡ്. 2006 മുതല് രണ്ട് തവണയായി ക്ഷേത്രത്തില് പാരമ്പര്യ ട്രസ്റ്റ് ബോര്ഡ് നിയമിക്കുന്നതിന് വേണ്ടി ദേവസ്വം ബോര്ഡിന്റെ ഭാഗത്ത് നിന്നും ശ്രമം നടന്നിരുന്നു. ഇതിനെതിരെ ഹൈക്കോടതിയില് നിന്നും സുപ്രീംകോടതിയില് നിന്നും ട്രസ്റ്റ് ബോര്ഡ് അംഗങ്ങളെ നിയമിക്കുന്നതിനായി പുറത്തിറക്കിയ ഉത്തരവുകള് റദ്ദ് ചെയ്തിരുന്നു. വിധി വന്ന് മാസങ്ങള് കഴിയുന്നതിന് മുമ്പാണ് മൂന്നാം തവണയും ക്ഷേത്രത്തിലേക്ക് പാരമ്പര്യേതര ട്രസ്റ്റിയെ നിയമിക്കാനുള്ള അറിയിപ്പ് ദേവസ്വം ബോര്ഡ് പത്രങ്ങളിലൂടെ നല്കിയിരിക്കുന്നത്.
കേരളത്തിലെ ക്ഷേത്രങ്ങളുടെ പുനരുദ്ധാരണത്തിന് തുടക്കം കുറിച്ച കേരള ഗാന്ധി കേളപ്പജിയുടെ നേതൃത്വത്തില് നടന്ന തളിപ്രക്ഷോഭം ഐതിഹാസികമായിരുന്നു. ഭക്തജന പ്രക്ഷോഭത്തിന് മുമ്പില് സര്ക്കാരിന് മുട്ടുമടക്കേണ്ടി വന്ന ചരിത്രമാണ് തളിമഹാദേവ ക്ഷേത്രത്തിനുള്ളത്. കേരള ക്ഷേത്ര സംരക്ഷണ സമിതിയുടെ രൂപീകരണത്തിനും ഇത് വഴിതെളിച്ചു.
മലബാര് ദേവസ്വം ബോര്ഡിന്റെ നടപടിക്കെതിരെ ശക്തമായ പ്രക്ഷോഭ പരിപാടികള്ക്ക് ഒരുങ്ങുകയാണ് കേരള ക്ഷേത്രസംരക്ഷണ സമിതി. ഇതിന്റെ ഭാഗമായി 25ന് ക്ഷേത്രത്തില് ഉപവാസ സമരം സംഘടിപ്പിക്കും. 1968ല് ആരാധനക്കായി ക്ഷേത്രത്തില് പ്രവേശിക്കുന്നത് പോലും സര്ക്കാര് നിരോധിച്ചിരുന്നു. എന്നാല് ഇപ്പോള് അതേ ക്ഷേത്രത്തിന്റെ ഭരണാധികാരം പിടിച്ചെടുക്കാനാണ് ദേവസ്വം ബോര്ഡ് പരിശ്രമിക്കുന്നത്. തുടര്ന്നും ദേവസ്വം ബോര്ഡ് ഈ നടപടിയില് നിന്നും പിന്നോട്ട് പോകുന്നില്ലെങ്കില് തളി ക്ഷേത്രസംരക്ഷണത്തിനായി കേരളം മുഴുവന് ഒരുമിക്കുന്ന പ്രക്ഷോഭം നടത്തുമെന്ന് കേരള ക്ഷേത്രസംരക്ഷണ സമിതി മലപ്പുറം ജില്ലാ കമ്മിറ്റി പ്രസിഡന്റ് സി.വി. സുബ്രഹ്മണ്യന്, ജില്ലാ സെക്രട്ടറി ടി.പി. സുധീഷ് എന്നിവര് അറിയിച്ചു.
