തിരുനാവായ: മഹാമാഘ മഹോത്സവത്തിന്റെ ഭാഗമായി നടക്കേണ്ട രഥയാത്ര തമിഴ്നാട് സര്ക്കാര് തടഞ്ഞ സംഭവം ദൗര്ഭാഗ്യകരമാണെന്ന് മഹാമണ്ഡലേശ്വര് സ്വാമി ആനന്ദവനം ഭാരതി. തിരുനാവായയില് മാധ്യമങ്ങളോട് സംസാരിക്കുകയായിരുന്നു അദ്ദേഹം. പാലക്കാട് നിന്ന് മുന് നിശ്ചയിച്ച പ്രകാരം രഥയാത്ര തുടരും. പാലക്കാട് മുതലുള്ള ക്ഷേത്രങ്ങളിലെ സ്വീകരണങ്ങള്ക്കും മാറ്റമില്ല. ചെന്നൈയില് നിന്നോ തിരുവനന്തപുരത്ത് നിന്നോ നിര്ദേശിക്കുന്നതിനനുസരിച്ചാണോ ഇത്തരം തടസങ്ങള് ഉണ്ടാകുന്നതെന്നറിയില്ല.
രഥയാത്രയുടെ തുടക്കത്തിന് തൊട്ടുമുമ്പാണ് അനുമതി നിഷേധിച്ചത്. മഹാമേരുവിനെ പ്രതിഷ്ഠിച്ച വാഹനം സഞ്ചരിക്കുന്നത് കൊണ്ട് ഗതാഗത തടസമുണ്ടാകില്ല. സ്വീകരണം നടക്കുന്നത് ക്ഷേത്രപരിസരത്താണ്. തമിഴ്നാട്ടിലെ ആധീനങ്ങളും കോയമ്പത്തൂര്, പൊള്ളാച്ചി, മഥുര, തിരുനെല്വേലി എന്നിവിടങ്ങളിലെ ആശ്രമങ്ങളുമാണ് രഥയാത്രയുടെ സംഘാടകര്. രണ്ട് ദിവസത്തെ പര്യടനത്തിന് ശേഷം പാലക്കാട് എത്തുന്ന രീതിയിലായിരുന്നു ക്രമീകരണം.
തമിഴ്നാട്ടില് രാഷ്ട്രീയ പാര്ട്ടികളുടെയും മറ്റും വലിയ പരിപാടികള് നടക്കാറുണ്ട്. ഇതിനിടയില് രഥയാത്രക്ക് അനുമതി നിഷേധിച്ചത് എന്തുകൊണ്ടാണെന്ന് അറിയില്ല. തിരുനാവായയിലും താത്കാലിക പാലം നിര്മിക്കുന്നതുമായി ബന്ധപ്പെട്ട് സമാനമായ രീതിയില് ഭരണകൂടം തടസങ്ങള് സൃഷ്ടിച്ചിരുന്നു. സര്ക്കാര് ഇത്തരം പരിപാടികള്ക്ക് മാത്രം അനുവാദം നിഷേധിക്കുകയാണ്. സ്വാമിജി പറഞ്ഞു.
