വേദന ശരീരം കാര്ന്നുതിന്നുമ്പോഴും, സ്വപ്നങ്ങള് കൈവിടാന് സിയ ഫാത്തിമ തയ്യാറായിരുന്നില്ല. സ്വപ്നങ്ങള്ക്ക് കരുതലായി ഒപ്പം അധികൃതരും കൂട്ടുനിന്നപ്പോള് കലോത്സവ വേദിയില് പിറന്നത് പുതുചരിത്രം. സംസ്ഥാന സ്കൂള് കലോത്സവ വേദിയിലെത്താന് കഴിയാതെ വിഷമിച്ചിരുന്ന സിയ ഇന്നലെ അറബിക് പോസ്റ്റര് ഡിസൈനിംഗ് മത്സരത്തില് വീഡിയോ കോണ്ഫറന്സിലൂടെ പങ്കെടുത്തു. വെര്ച്വല് ആയി, ആത്മവിശ്വാസത്തോടെ.കാസര്കോട് ജില്ലയിലെ വി.കെ.പി.കെ.എച്ച്.എം.എം.ആര്.വി.എച്ച്.എസ്.എസിലെ വിദ്യാര്ത്ഥിനിയായ സിയ ഫാത്തിമ ‘വാസ്കുലൈറ്റിസ്’ എന്ന ഗുരുതര രോഗത്തോട് പോരാടുകയാണ്. യാത്ര ചെയ്യുന്നത് പോലും ജീവന് ഭീഷണിയായേക്കാമെന്ന ഡോക്ടര്മാരുടെ കര്ശന നിര്ദേശപ്രകാരമാണ് അവള്ക്ക് തൃശൂരിലെ കലോത്സവത്തില് നേരിട്ട് പങ്കെടുക്കാന് കഴിയാതെയായത്.
എന്നാല് കലോത്സവ വേദിയില് മത്സരിക്കണമെന്ന ആഗ്രഹം പൊതുവിദ്യാഭ്യാസ മന്ത്രി വി. ശിവന്കുട്ടിയെ സന്ദേശത്തിലൂടെ അറിയിച്ചു. മത്സരത്തിനായി വേദിയിലെത്താന് കഴിയാത്ത ഒരു കുട്ടിയുടെ സ്വപ്നം അതോടെ ഭരണകൂടത്തിന്റെ പരിഗണനയായി. സര്ക്കാര് പ്രത്യേക ഉത്തരവ് പുറപ്പെടുവിച്ചു.
അങ്ങനെ, തൃശൂരിലെ സി.എം.എസ്.എച്ച്.എസ്.എസില് നടന്ന അറബിക് പോസ്റ്റര് ഡിസൈനിങ് മത്സരത്തില് രാവിലെ 11 മണിക്ക് സിയ ഫാത്തിമയ്ക്ക് വീഡിയോ കോണ്ഫറന്സ് മുഖേന മത്സരിക്കാനുള്ള അവസരം ലഭിച്ചു. വേദിയിലെ മറ്റു മത്സരാര്ത്ഥികളെപ്പോലെ തന്നെ അധികൃതരുടെ നിരീക്ഷണത്തിലും മൂല്യനിര്ണയത്തിലുമാണ് സിയയുടെ പ്രകടനവും വിലയിരുത്തിയത്.
പൊതു വിദ്യാഭ്യാസ വകുപ്പ് മന്ത്രി വി. ശിവന്കുട്ടി, റവന്യൂ മന്ത്രി കെ. രാജന് എന്നിവരും മത്സരം വീക്ഷിക്കാനെത്തിയിരുന്നു.
