തൃശൂര്: ഷിന്സി പാടുമ്പോള് സ്വയം പാട്ടിലലിയും. കൈകള് പാട്ടിന്റെ വഴിയെ സഞ്ചരിക്കും. ഷിന്സി പാടുന്നത് കേള്ക്കുന്നത് പോലെ കാണാനും രസമാണ്. താളത്തിന് അനുസരിച്ച് കൈകള് ചലിക്കുകയും മുഖത്ത് ഭാവങ്ങള് വിരിയുകയും ചെയ്യും. ജിവിഎച്ച്എസ്എസ് കടവൂരിലെ പ്ലസ് ടൂ വിദ്യാര്ഥിയാണ് സ്റ്റാര് സിംഗര് റിയാലിറ്റി ഷോയിലെ മത്സരാര്ഥിയായ ഷിന്സി. ലളിതഗാനം ഹയര് സെക്കണ്ടറി വിഭാഗം മത്സരത്തില് പങ്കെടുക്കാനാണ് പോത്താനിക്കാട് സ്വദേശിയായ ഷിന്സി തൃശൂരില് എത്തിയത്.
പാട്ടാണ് ഷിന്സിയുടെ ലോകം. എല്ലാവരും ഇഷ്ടപ്പെടുന്ന ഒരു നല്ല പാട്ടുകാരിയാകാന് ആണ് ഷിന്സിക്ക് ഇഷ്ടം. ഇലക്ട്രീഷ്യന് ആയ ഷിജുവിന്റെയും ജാന്സിയുടെയും മകള് ആണ് ഷിന്സി. അച്ഛന്റെയും അമ്മുടെയും പാടാനുള്ള കഴിവാണ് മക്കളായ ഷിന്സിക്കും എമീമയ്ക്കും കിട്ടിയത്. ഏറെക്കാലത്തെ ഷിന്സിയുടെ ആഗ്രഹമായിരുന്നു സ്റ്റാര് സിംഗര് വേദിയില് പാടുക എന്നത്. മാര്ഗ്ഗഴി തിങ്കളല്ലവ, ആടി വാ കാറ്റേ പാടി വാ കാറ്റേ എന്നീ ഗാനങ്ങള് പാടി ശ്രദ്ധ പിടിച്ചുപറ്റിയ ഷിന്സി പ്രേക്ഷകര്ക്ക് സ്വന്തം മിന്നുക്കുട്ടിയാണ്.
