‘വൈകുണ്ഠപുര വാസനേ…’ എന്ന രേവതി രാഗത്തിലെ കീര്ത്തനം പാടിത്തുടങ്ങിയപ്പോള് പൂവണിഞ്ഞത് എട്ടാം ക്ലാസുകാരി ശ്രേയയുടെ നൃത്തം എന്ന മോഹപ്പൂവാക. ശ്രേയയ്ക്ക് നൃത്തത്തോടുള്ള അഭിനിവേശം ഒന്നുകൊണ്ടു മാത്രമാണ് 64-ആമത് സംസ്ഥാന സ്കൂള് കലോത്സവ വേദിയില് ചിലങ്കയിടാനായത്.
മൂന്നാം വയസ്സുമുതല് അമ്മയുടെ സാമീപ്യമില്ലാതെ, ചെറിയ പ്രായത്തിനുള്ളില് ജീവിതത്തിന്റെ കയ്പുനീര് ഏറെ കുടിച്ചിട്ടും, തളരാതെ പിടിച്ചു നില്ക്കാന് സാധിച്ചത് അച്ഛന്റെ കൈത്താങ്ങ് കൊണ്ടുമാത്രമാണ്. എല്കെജി മുതല് നൃത്തം പരിശീലിച്ചു വരികയാണ് ഈ കുഞ്ഞുകലാകാരി. നൃത്താധ്യാപകനും അഭിഭഷകനുമായ സോനു ശ്രീകുമാര് ആണ് നിലവില് ശ്രേയയ്ക്ക് ഇപ്പോള് ഉള്ള ഏക ആശ്വാസം. കൊല്ലം ജില്ല കോടതിയിലെ അഭിഭാഷകനാണ് സോനു.
കോടതിയില് പോകുന്നതിനു മുന്പും കോടതിയില് നിന്ന് മടങ്ങി വന്നതിന് ശേഷവുമാണ് നൃത്തം പഠിപ്പിക്കുന്നത്. സവാരിയ സ്പേസ് ഫോര് ഡാന്സ് എന്ന വിദ്യാലയത്തിലെ പ്രധാന അധ്യാപകനും കൂടിയാണ് സോനു. തിരുവനന്തപുരം ജില്ലയിലെ കാര്മ്മല് ഹയര് സെക്കണ്ടറി സ്കൂളിലെ വിദ്യാര്ത്ഥിനിയാണ് ശ്രേയ ആര്. നായര്. കലയോടുള്ള അടങ്ങാത്ത സ്നേഹം ആ കുട്ടിയെ ഉയരങ്ങളിലേക്ക് എത്തിക്കും എന്നാണ് അധ്യാപകനായ സോനുവിന് ശ്രേയയെക്കുറിച്ചുള്ള അഭിപ്രായം. ലാസ്യം തനതു ശൈലിയില് അവതരിപ്പിക്കാന് കഴിയുന്നു എന്നതാണ് മറ്റു കുട്ടികളില് നിന്ന് ശ്രേയയെ വ്യത്യസ്തയാക്കുന്നത് എന്നും അദ്ധ്യാപകന് കൂട്ടിച്ചേര്ത്തു.
