തിരുവല്ല: മൂന്നാം ബലാത്സംഗക്കേസിൽ രാഹുൽ മാങ്കൂട്ടത്തിലുമായി ആദ്യ തെളിവെടുപ്പ് പൂർത്തിയാക്കി അന്വേഷണ സംഘം. തിരുവല്ലയിലെ ക്ലബ് സെവൻ ഹോട്ടലിലെ നാലാം നിലയിലെ 408ാം നമ്പർ മുറിയിലാണ് തെളിവെടുപ്പ്. ഇന്ന് പുലർച്ചെ 5.30 ഓടെ പത്തനംതിട്ട എആർ ക്യാമ്പിൽ നിന്നും അന്വേഷണ സംഘം രാഹുൽ മാങ്കൂട്ടത്തിലു മായി തിരുവല്ലയിലേക്ക് പുറപ്പെടുകയും 6.30 ഓടെ ഹോട്ടലിൽ എത്തിയത്.
ഹോട്ടലിലെ 408-ാം നമ്പര് മുറിയിലാണ് പോലീസ് പരിശോധന നടത്തിയത്. ക്ലബ് 7 ഹോട്ടലില് വന്ന കാര്യം രാഹുല് സമ്മതിച്ചിട്ടുണ്ട്. 408ാം നമ്പര് മുറിയും രാഹുല് തിരിച്ചറിഞ്ഞിട്ടുണ്ട്. അതിജീവിതയുമായി സംസാരിക്കാനാണ് എത്തിയതെന്നായിരുന്നു രാഹുലിന്റെ പ്രതികരണം. എന്നാല് പീഡിപ്പിച്ചെന്ന പരാതിയില് രാഹുല് മറുപടി നല്കിയിട്ടില്ല. അതിജീവിത നല്കിയ മൊഴിയുമായി ബന്ധപ്പെട്ട് കൂടുതല് കാര്യങ്ങള് ആരായാന് ഇന്ന് വിശദമായി വീണ്ടും രാഹുലിനെ ചോദ്യം ചെയ്യും.
പുലർച്ചെ മറ്റാരേയും അറിയിക്കാതെയാണ് അന്വേഷണ സംഘം രാഹുൽ മാങ്കൂട്ടത്തിലുമായി തെളിവെടുപ്പിന് എത്തിയത്. അതീവ സുരക്ഷയിലാണ് തെളിവെടുപ്പ് നടന്നത്. വലിയ പോലീസ് സംഘമാണ് സുരക്ഷ ഒരുക്കിയത്. പ്രതിഷേധങ്ങൾ കണക്കിലെടുത്താണ് വലിയ സുരക്ഷ ഒരുക്കിയതും പുലർച്ചെ തെളിവെടുപ്പിന് എത്തിയതും. ഇന്നലെ പ്രതിയുമായി കോടതിയിൽ എത്തിയപ്പോഴും ആശുപത്രിയിലെത്തിയപ്പോഴും വഴിയിലുമൊക്കെയായി വലിയ പ്രതിഷേധമാണ് ഉയര്ന്നത്. ഇനി രാഹുൽ മാങ്കൂട്ടത്തുലുമായി അന്വേഷണ സംഘം പത്തനംതിട്ട എആർ ക്യാമ്പിൽ തിരിച്ചെത്തുകയും വീണ്ടും ചോദ്യം ചെയ്യൽ തുടരുകയും ചെയ്യും. ഇന്നലെ രാത്രി ഏറെ വൈകിയും ചോദ്യം ചെയ്യൽ തുടർന്നതായാണ് വിവരം. മറ്റിടങ്ങളിലും ഇനി രാഹുൽ മാങ്കൂട്ടത്തിലുമായി തെളിവെടുപ്പ് നടത്തും.
