തിരുവനന്തപുരം: ശബരിമല സ്വര്ണക്കൊള്ള കേസില് കുറ്റവാളികള് ആരായാലും അവര്ക്കെതിരെ ശക്തമായ നടപടി സ്വീകരിക്കണമെന്നും കേസ് സിബിഐക്ക് വിടണമെന്നും അഖില തന്ത്രി പ്രചാരക് സഭ ആവശ്യപ്പെട്ടു.
മുന് ദേവസ്വം മന്ത്രി കടകംപള്ളി സുരേന്ദ്രനെ അന്വേഷണ സംഘം ചോദ്യം ചെയ്തതായി വാര്ത്ത വന്നിരുന്നു എന്നാല് പിന്നീട് എന്തുണ്ടായി എന്നതിനെക്കുറിച്ച് ഒരു വിവരവുമില്ല. അതുപോലെ, ഈ കവര്ച്ച നടന്ന കാലത്തെ ദേവസ്വം ബോര്ഡ് പ്രസിഡന്റും മറ്റ് അംഗങ്ങളും എന്തുകൊണ്ട് ഇപ്പോഴും നിയമത്തിന് പുറത്തുനില്ക്കുന്നു. അവരെ എന്തുകൊണ്ട് അറസ്റ്റ് ചെയ്യുന്നില്ല. ഈ അന്വേഷണത്തില് വലിയ രാഷ്ട്രീയ ഇടപെടലുകള് ഉണ്ട്. സിപിഎം നേതാക്കളെ സംരക്ഷിക്കാന് ശ്രമം നടക്കുന്നുവെന്നും സംശയമുണ്ട്. കവര്ച്ച ചെയ്യപ്പെട്ട സ്വര്ണം എവിടെയെത്തി, ആ പണം ആരുടെയൊക്കെ കൈകളില് എത്തി എന്നതുപോലുള്ള പ്രധാനപ്പെട്ട കാര്യങ്ങളിലേക്ക് അന്വേഷണം കടന്നുചെന്നിട്ടേയില്ല എന്നത് വ്യക്തമായ കാര്യമാണ്. പൂര്ണമായും അത് കണ്ടെത്തണമെന്നും അഖില തന്ത്രി പ്രചാരക് സഭ ആവശ്യപ്പെട്ടു.
മകരവിളക്ക് അടുത്തിരിക്കെ, ഭക്തജനങ്ങളുടെ വികാരങ്ങളെ മാനിക്കാതെ തന്ത്രിയെ അറസ്റ്റ് ചെയ്തത് ഞെട്ടിക്കുന്നതും വേദനിപ്പിക്കുന്നതുമാണ്. അടിയന്തരമായി എല്ലാ ദുരൂഹതകളും നീക്കി യഥാര്ത്ഥ കുറ്റവാളികളെ നിയമത്തിന് മുന്നില് കൊണ്ടുവരണമെന്നും അഖില തന്ത്രി പ്രചാരക് സഭ ദേശീയ ചെയര്മാന് എം.എസ്. ശ്രീരാജ്കൃഷ്ണന് പോറ്റി, ദേശീയ ജനറല് സെക്രട്ടറി രാജേഷ് കെ.ആര്., ദേശീയ വൈസ് ചെയര്മാന് നീലമന വിഷ്ണുനമ്പൂതിരി, സമിതി അംഗംങ്ങളായ രഘുനാഥ്, അഖില് യു.എസ്. എന്നിവര് വാര്ത്താസമ്മേളനത്തില് പറഞ്ഞു.
