തിരുവനന്തപുരം: കേരള സര്വകലാശാല വൈസ് ചാന്സലര് ഡോ.മോഹനന് കുന്നുമ്മല് മുന് രജിസ്ട്രാര് ഡോ. കെ എസ് അനില് കുമാറിനെതിരെ പുറപ്പെടുവിച്ച ഉത്തരവുകള് ഹൈക്കോടതി സ്റ്റേ ചെയ്തു.
ഭാരതാംബയുടെ ചിത്രം വച്ച് സെനറ്റ് ഹാളില് ഗവര്ണറെ പങ്കെടുപ്പിച്ച് സ്വകാര്യ സംഘടന നടത്തിയ പരിപാടിക്കുളള അനുമതി രജിസ്ട്രാര് എസ് എഫ് ഐ, കെ എസ് യു സംഘടനകളുടെ പ്രതിഷേധത്തെ തുടര്ന്ന് റദ്ദാക്കിയിരുന്നു. ഗവര്ണര് രാജ്ഭവനില് നിന്ന് പുറപ്പെടുന്നതിന് തൊട്ടുമുമ്പ് അനുമതി റദ്ദാക്കിയത് അദ്ദേഹത്തോടുളള അവഹേളനമെന്ന് കാട്ടി വി സി രജിസ്ട്രാറെ സസ്പന്ഡ് ചെയ്തു. എന്നാല് സസ്പന്ഷന് അംഗീകരിക്കാതെ ഇടത് സിന്ഡിക്കേറ്റിന്റെ പിന്തുണയോടെ രജിസ്ട്രാര് ഓഫീസിലെത്തി ഫയലുകള് നോക്കിയതോടെയാണ് വിഷയം കോടതിയിലെത്തിയത്.
രജിസ്ട്രാര് കെ എസ് അനില് കുമാറിന്റെ സസ്പെന്ഷന് ഹൈക്കോടതി ആദ്യഘട്ടത്തില് അംഗീകരിച്ചിരുന്നു. പിന്നീട് മുഖ്യമന്ത്രിയും ഗവര്ണറും തമ്മിലുളള ചര്ച്ചയുടെ പിന്നാലെ അദ്ദേഹം സ്ഥലംമാറ്റം വാങ്ങിപ്പോയി. എന്നാല് നിയമപോരാട്ടം തുടര്ന്നു.സസ്പെന്ഷന് കാലയളവില് ഫയലുകള് നോക്കിയതുമായി ബന്ധപ്പെട്ട് തനിക്ക് കാരണം കാണിക്കല് നോട്ടീസ് നല്കാനുളള അധികാരം വി സി ക്ക് ഇല്ലെന്ന് ചൂണ്ടിക്കാട്ടിയാണ് അനില് കുമാര് ഹൈക്കോടതിയില് ഹര്ജി നല്കിയത്. ഈ ഹര്ജിയിന്മേലാണ് കോടതിയുടെ ഇപ്പോഴത്തെ നടപടി.
കെ എസ് അനില് കുമാറിനെതിരായ കാരണം കാണിക്കല് നോട്ടീസും ഇതിന്റെ തുടര് നടപടികളും അടക്കമുള്ള ഉത്തരവുകളാണ് ഹൈക്കോടതി സ്റ്റേ ചെയ്തത്. 10(13) ചട്ടപ്രകാരം ഏതെങ്കിലും തരത്തില് നോട്ടീസ് അയയ്ക്കാന് വിസിക്ക് അധികാരമുണ്ടെങ്കില് അത് വിശദീകരിക്കണമെന്നാണ് കോടതി നിര്ദേശം. വിശദീകരണം നല്കുന്നതുവരെ പഴയ ഉത്തരവുകള്ക്കുള്ള സ്റ്റേ തുടരും.
