സംസ്ഥാനത്ത് വിവിധ വിദ്യാലയങ്ങൾക്ക് ഇന്നും നാളെയും അവധി; മൂന്ന് ജില്ലകളിൽ തദ്ദേശ തെരഞ്ഞെടുപ്പ്

കൊച്ചി: സ്ഥാനാർഥികളുടെ മരണത്തെ തുടർന്ന് മാറ്റിവെച്ച മൂന്ന് തദ്ദേശ വാര്‍ഡുകളിലെ തെരഞ്ഞെടുപ്പ് ഇന്ന്‌ നടക്കും. തെരഞ്ഞെടുപ്പോടനുബന്ധിച്ച് വിവിധ വിദ്യാലയങ്ങൾക്ക് ഇന്ന്‌
(ജനുവരി 12, തിങ്കളാഴ്ച) ജില്ലാ കളക്ടർമാർ അവധി പ്രഖ്യാപിച്ചു.

ചില വിദ്യാലയങ്ങൾക്ക് നാളെയും (ജനുവരി 13, ചൊവ്വാഴ്ച) അവധിയാണ്. തിരുവനന്തപുരം കോര്‍പ്പറേഷൻ വിഴിഞ്ഞം വാര്‍ഡ്, മലപ്പുറം മൂത്തേടം ഗ്രാമപഞ്ചായത്ത് പായിമ്പാടം വാര്‍ഡ്, എറണാകുളം പാമ്പാക്കുട ഗ്രാമപഞ്ചായത്ത് ഓണക്കൂര്‍ വാര്‍ഡ് എന്നിവിടങ്ങളിലാണ് തെരഞ്ഞെടുപ്പ്.

ഇന്ന്‌ തിരഞ്ഞെടുപ്പ് നടക്കുന്ന പാമ്പാക്കുട ഗ്രാമപഞ്ചായത്തിലെ പത്താം വാർഡിൽ ജില്ലാ കളക്ടർ പ്രാദേശിക അവധി പ്രഖ്യാപിച്ചു. സർക്കാർ ഓഫീസുകൾക്കും വിദ്യാഭ്യാസ സ്ഥാപനങ്ങൾക്കുമടക്കമാണ് അവധിയെന്ന് എറണാകുളം ജില്ലാ ഇൻഫർമേഷൻ ഓഫീസ് അറിയിച്ചു. തിങ്കളാഴ്ച മാത്രമാണ് ഇവിടെ അവധി പ്രഖ്യാപിച്ചിരിക്കുന്നത്.

മലപ്പുറത്തെ ഈ വിദ്യാലയങ്ങൾക്ക് തിങ്കൾ, ചൊവ്വ ദിവസങ്ങളിൽ അവധി
തദ്ദേശ തെരഞ്ഞെടു്പപോടനുബന്ധിച്ച് മലപ്പുറം ജില്ലയിലെ ഒരു സ്കൂളിനാണ് ജില്ലാ കളക്ടർ അവധി പ്രഖ്യാപിച്ചത്. മൂത്തേടം പഞ്ചായത്തിലെ പായിംപാടം (ഏഴ്) വാര്‍ഡില്‍ ജനുവരി 12ന് തെരഞ്ഞെടുപ്പ് നടക്കുന്ന സാഹചര്യത്തില്‍ പോളിങ് സ്റ്റേഷനായ കാരപ്പുറം ക്രസൻ്റ് യുപി സ്‌കൂളിനാണ് (വടക്ക് ഭാഗം) വോട്ടെടുപ്പ് ദിവസമായ ജനുവരി 12 നും വോട്ടെണ്ണല്‍ ദിവസമായ  13നും ജില്ലാ കളക്ടര്‍ പ്രാദേശിക അവധി പ്രഖ്യാപിച്ചത്. വാര്‍ഡ് പരിധിക്കുള്ളില്‍ വരുന്ന സര്‍ക്കാര്‍ സ്ഥാപനങ്ങള്‍ക്കും വിദ്യാഭ്യാസ സ്ഥാപനങ്ങള്‍ക്കും വോട്ടെടുപ്പ് ദിനമായ 12ന് (തിങ്കള്‍) പ്രാദേശിക അവധി പ്രഖ്യാപിച്ചിട്ടുണ്ട്.

തെരഞ്ഞെടുപ്പ് നടക്കുന്ന വാര്‍ഡിലെ വോട്ടര്‍മാരായ സര്‍ക്കാര്‍, അര്‍ധസര്‍ക്കാര്‍, പൊതുമേഖല സ്ഥാപനങ്ങള്‍, നിയമാനുസൃത കമ്പനികള്‍, ബോര്‍ഡുകള്‍, കോര്‍പറേഷനുകള്‍ എന്നവയിലെ ജീവനക്കാര്‍ക്ക് പോളിങ് സ്റ്റേഷനില്‍ പോയി വോട്ട് ചെയ്യാനുള്ള അനുമതി അതത് സ്ഥാപനമേധാവികള്‍ നല്‍കണമെന്നും ജില്ലാ തെരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കളക്ടര്‍ വിആര്‍ വിനോദ് നിര്‍ദേശിച്ചു.

തെരഞ്ഞെടുപ്പ് പ്രദേശങ്ങളിൽ മദ്യ നിരോധനം
തെരഞ്ഞെടുപ്പ് നടക്കുന്ന മൂത്തേടം പഞ്ചായത്തിലെ ഏഴാം വാര്‍ഡില്‍ ഇന്ന്‌ വൈകുന്നേരം ആറുവരെയും വോട്ടെണ്ണല്‍ ദിനമായ ജനുവരി 13നും (ചൊവ്വ) മദ്യനിരോധനം ഏര്‍പ്പെടുത്തി ജില്ലാ കളക്ടര്‍ ഉത്തരവിട്ടിട്ടുണ്ട്. 2002 ലെ കേരള അബ്കാരി ഷോപ്പ്‌സ് ഡിസ്‌പോസല്‍, 1953 ലെ ഫോറിന്‍ ലിക്വര്‍ ചട്ടങ്ങള്‍ എന്നിവ പ്രകാരമാണ് സമ്പൂര്‍ണ മദ്യനിരോധനം ഏര്‍പ്പെടുത്തിയത്.

തിരുവനന്തപുരം കോർപറേഷനിലെ വിഴിഞ്ഞം വാര്‍ഡില്‍ ഇന്ന്‌ നടക്കുന്ന തെരഞ്ഞെടുപ്പുമായി ബന്ധപ്പെട്ട് പ്രദേശത്തും സമ്പൂര്‍ണ മദ്യ നിരോധനം ഏര്‍പ്പെടുത്തിയിട്ടുണ്ട്. ജില്ലാ കളക്ടര്‍ അനു കുമാരിയാണ് ഇതുമായി ബന്ധപ്പെട്ട ഉത്തരവ് പുറപ്പെടുവിച്ചത്.  വോട്ടെണ്ണല്‍ ദിനമായ ജനുവരി 13നുമാണ് പ്രദേശത്ത് സമ്പൂര്‍ണ മദ്യനിരോധനം ഏര്‍പ്പെടുത്തിയത്.