വാഷിങ്ടൺ: വെനസ്വേലയിലെ പ്രതിപക്ഷ നേതാവും സമാധാന നൊബേൽ ജേതാവുമായ മരിയ കൊരീന മച്ചാഡോയുമായി അടുത്ത ആഴ്ച കൂടിക്കാഴ്ച നടത്തുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. മച്ചാഡോ പങ്കുവയ്ക്കാൻ ആഗ്രഹിക്കുന്നതായി അറിയിച്ച സമാധാന നൊബേൽ പുരസ്കാരം സ്വീകരിക്കാൻ താൻ സന്നദ്ധനാണെന്നും ട്രംപ് വ്യക്തമാക്കി.
തനിക്കു ലഭിച്ച സമാധാന നൊബേൽ പുരസ്കാരം അമേരിക്കൻ പ്രസിഡന്റ് ഡൊണൾഡ് ട്രംപ് ഉൾപ്പെടെയുള്ള അന്താരാഷ്ട്ര നേതാക്കൾക്ക് സമർപ്പിക്കുമെന്ന് മരിയ കൊരീന മച്ചാഡോ നേരത്തെ അറിയിച്ചിരുന്നു.അടുത്ത ആഴ്ച മരിയ കൊരീന മച്ചാഡോ യുഎസ് സന്ദർശനം നടത്തുന്നുണ്ടെന്ന സൂചനകളുണ്ടെന്നും, സമാധാന നൊബേൽ പുരസ്കാരം സ്വീകരിക്കുന്നതിൽ തനിക്ക് അഭിമാനമുണ്ടെന്നും ട്രംപ് രാജ്യാന്തര മാധ്യമത്തിന് നൽകിയ അഭിമുഖത്തിൽ പറഞ്ഞു.
എന്നാൽ, കൂടിക്കാഴ്ച സംബന്ധിച്ച് മച്ചാഡോയുടെ ഓഫിസ് ഔദ്യോഗിക സ്ഥിരീകരണം നൽകിയിട്ടില്ല. വൈറ്റ് ഹൗസും കൂടിക്കാഴ്ചയുടെ വിശദാംശങ്ങൾ വെളിപ്പെടുത്താൻ തയ്യാറായിട്ടില്ല. വെനസ്വേലയിലെ പ്രതിപക്ഷ നേതാവും ദേശീയ അസംബ്ലി അംഗവുമായ മച്ചാഡോ 2002ലാണ് രാഷ്ട്രീയരംഗത്ത് സജീവമായത്.
