കൊച്ചി:ഗുരുവായൂര് ദേവസ്വം നിയമനത്തില് ദേവസ്വം റിക്രൂട്ട്മെന്റ് ബോര്ഡിന്റെ അധികാരം റദ്ദാക്കി ഹൈക്കോടതി ഡിവിഷന് ബെഞ്ച് . ഗുരുവായൂര് ദേവസ്വത്തിലെ നിയമനങ്ങള് നടത്താന് കേരള ദേവസ്വം റിക്രൂട്ട്മെന്റ് ബോര്ഡിന് (കെഡിആര്ബി) അധികാരമില്ലെന്നാണ് ഹൈക്കോടതി ഉത്തരവില് വ്യക്തമാക്കിയത്.
നിയമനത്തിനായി നിലവിലെ വിജ്ഞാപനങ്ങള് റദ്ദാക്കിയാണ് ഹൈക്കോടതി ഉത്തരവ്. നിയമനങ്ങളില് സുതാര്യത ഉറപ്പാക്കാന് മൂന്നംഗ മേല്നോട്ടസമിതിയെയും ഹൈക്കോടതി നിയോഗിച്ചു.വിരമിച്ച ജസ്റ്റിസ് പി.എന്.രവീന്ദ്രന് അധ്യക്ഷനായ സമിതിയില് അഡ്വ.കെ.ആനന്ദ്, ദേവസ്വം അഡ്മിനിസ്ട്രേറ്റര് എന്നിവര് അംഗങ്ങളാണ്.നിയമന പ്രക്രിയയുടെ മേല്നോട്ടത്തിനും നിയന്ത്രണത്തിനുമായി രൂപീകൃതമായ പ്രത്യേക സമിതിയുടെ കാലാവധി ഒരു വര്ഷമായിരിക്കും.
എന്നാല് റിക്രൂട്ട്മെന്റ് ബോര്ഡ് വഴി നടന്ന നിയമനങ്ങളെ ഈ വിധി ബാധിക്കില്ലെന്നും അവര്ക്ക് ജോലിയില് തുടരാമെന്നും ഹൈക്കോടതി പറഞ്ഞു. ഗുരുവായൂര് ദേവസ്വത്തിലെ വിവിധ തസ്തികകളിലേക്കും ദേവസ്വത്തിന് കീഴിലുള്ള എയ്ഡഡ് വിദ്യാഭ്യാസ സ്ഥാപനങ്ങളിലെ തസ്തികകളിലേക്കും നിയമനത്തിന് അനുമതി നല്കുന്ന കെഡിആര്ബി സെക്ഷന് 9 നിയമവിരുദ്ധമാണെന്ന് ചൂണ്ടിക്കാട്ടിയാണ് അധികാരം ഹൈക്കോടതി റദ്ദാക്കിയത്. ഗുരുവായൂര് ദേവസ്വം എംപ്ലോയീസ് യൂണിയന് കോണ്ഗ്രസ് നല്കിയ ഹര്ജിയിലാണ് ഉത്തരവ്. ഗുരുവായൂര് ദേവസ്വത്തിലെ നിയമനം നടത്താന് അധികാരം ദേവസ്വം മാനേജിംഗ് കമ്മിറ്റിക്കാണെന്ന് ജസ്റ്റിസ് സുശ്രുത് അരവിന്ദ് ധര്മ്മാധികാരി, ജസ്റ്റിസ് ശ്യാംകുമാര് എന്നിവരുടെ ബഞ്ച് വിധിച്ചു.
ഇതോടെ, ഗുരുവായൂര് ദേവസ്വത്തിലെ ക്ലര്ക്ക് ഉള്പ്പെടെയുള്ള 38 തസ്തികളിലേക്ക് കെഡിആര്ബി മാസങ്ങള്ക്ക് മുമ്പ് പുറത്തിറക്കിയ വിജ്ഞാപനം റദ്ദാക്കും.
