തിരുവനന്തപുരം: ശബരിമല സ്വര്ണക്കൊള്ള കേസില് ദേവസ്വം മുന് മന്ത്രി കടകംപള്ളി സുരേന്ദ്രനെ ചോദ്യം ചെയ്തത് എന്തായെന്ന് കോണ്ഗ്രസ്.ശബരിമല തന്ത്രി കണ്ഠര് രാജീവരെ പ്രത്യേക അന്വേഷണ സംഘം അറസ്റ്റ് ചെയ്തതിന് പിന്നാലെയാണ് കെപിസിസി അധ്യക്ഷന് സണ്ണി ജോസഫ് ഇക്കാര്യം ചോദിച്ചത്.
തന്ത്രിയെ അറസ്റ്റ് ചെയ്തതത് അന്വേഷണത്തിന്റെ പുരോഗതിയാണ്.എന്നാല് മുന് മന്ത്രിയുടെ ചോദ്യം ചെയ്യല് എന്തായി?. കടകംപള്ളിയുടെ അഭിമുഖം ആണോ എടുത്തത്. ഇനിയും ഉന്നതര് ഉണ്ടെന്ന് സണ്ണി ജോസഫ് പറഞ്ഞു.രാഷ്ട്രീയ നേതൃത്വത്തിലെ പലരെയും ഒഴിവാക്കുന്നുണ്ട്. എല്ലാവരെയും പ്രതികളാക്കണം. ചുമതലയിലുള്ളവര് അറിയാതെ എങ്ങനെ മോഷണം നടത്താനാകുമെന്ന് കോടതി പലവട്ടം സംശയം പ്രകടിപ്പിച്ചിട്ടുണ്ട്. തന്ത്രിയെക്കാള് മുകളില് ആണ് ദേവസ്വം ബോര്ഡെന്നും തന്ത്രിയും മന്ത്രിയും എല്ലാവരും ഉത്തരവാദികളാണെന്നും തന്ത്രിയെ നിയന്ത്രിക്കേണ്ടത് മന്ത്രി ആയിരുന്നെന്നും കെ പി സി സി അധ്യക്ഷന് പറഞ്ഞു.
അന്വേഷണത്തില് പൂര്ണ തൃപ്തിയില്ല. ഉത്തരവാദിത്തപ്പെട്ട എല്ലാവരെയും പ്രതികളാക്കാന് അന്വേഷണ സംഘത്തിന് കഴിയണം. സര്ക്കാരുമായി ബന്ധമുള്ള അറസ്റ്റിലായവരെ സര്ക്കാര് സംരക്ഷിക്കുകയാണ്. മുന് എംഎല്എ എ പത്മകുമാര്, എന് വാസു എന്നിവര്ക്ക് എതിരെ സിപിഎം മിണ്ടിയിട്ടില്ല. പാര്ട്ടി തലത്തില് പോലും യാതൊരു നടപടിയും ഉണ്ടായിട്ടില്ല- സണ്ണി ജോസഫ് പറഞ്ഞു.
