സിഡ്നി: ആഷസ് ടെസ്റ്റ് പരമ്പരയില് ഇംഗ്ലണ്ടിന് ആശ്വസിക്കാന് ബോക്സിങ് ഡേ ടെസ്റ്റ് മാത്രം. സിഡ്നിയില് ഇന്നലെ അവസാനിച്ച അഞ്ചാമത്തെയും അവസാനത്തെയും മത്സരത്തോടെ ആഷസ് 2025-26 പൂരം സമാപിച്ചു. സിഡ്നിയില് ആധിപത്യപൂര്വ്വം അഞ്ച് വിക്കറ്റ് വിജയം സ്വന്തമാക്കിയ ഓസീസ് 4-1ന് പരമ്പര നേട്ടം ആഘോഷിച്ചു. ട്രാവിസ് ഹെഡ് കളിയിലെ താരവും മിച്ചല് സ്റ്റാര്ക് പരമ്പരയുടെ താരവുമായി.
സിഡ്നി ടെസ്റ്റിന്റെ ഒന്നാം ഇന്നിങ്സില് 384 റണ്സെടുത്ത ഓസീസിനെതിരെ ഇംഗ്ലണ്ട് 567 റണ്സെടുത്ത് ലീഡ് നേടിയിരുന്നു. ഇതിനെതിരെ പൊരുതിയ ഇംഗ്ലണ്ടിന്റെ രണ്ടാം ഇന്നിങ്സ് ഇന്നലെ 342 റണ്സില് ഒടുങ്ങി. അഞ്ച് വിക്കറ്റ് നഷ്ടത്തില് 161 റണ്സ് നേടിക്കൊണ്ട് ആതിഥേയരായ ഓസീസ് ഇംഗ്ലണ്ടിനെ മറികടന്നു.
സിഡ്നി ടെസ്റ്റിന്റെ അവസാന ദിവസമായ ഇന്നലെ അതിവേഗം സ്കോര് ചെയ്ത് ലക്ഷ്യത്തിലേക്ക് നീങ്ങിയ ഓസീസിനെ ഇടയ്ക്കിടെ വിക്കറ്റുകള് വീഴ്ത്തി ഇംഗ്ലണ്ട് സമ്മര്ദ്ദത്തിലാഴ്ത്തി. പക്ഷെ കുറഞ്ഞ വിജയലക്ഷ്യം ആതിഥേയര്ക്ക് തുണയായി. ട്രാവിസ് ഹെഡ്(29), ജെയ്ക് വെതറാള്ഡ്(34), മാര്നസ് ലഭൂഷെയ്ന്(37) തുടങ്ങിയവര് ഭേദപ്പെട്ട പ്രകടനം കാഴ്ച്ചവച്ച ഇന്നിങ്സില് ആലക്സ് കാരിയും(16) കാമറോണ് ഗ്രീനും(22) പുറത്താകാതെ നിന്ന് വിജയത്തിലേക്കെത്തിച്ചു. ഇംഗ്ലണ്ടിനായി ജോഷ് ടംഗ് മൂന്ന് വിക്കറ്റും വില് ജാക്സ് ഒരു വിക്കറ്റും നേടി.
ഇന്നലെ രാവിലെ എട്ട് വിക്കറ്റ് നഷ്ടത്തില് 302 എന്ന നിലയിലാണ് ഇംഗ്ലണ്ടിന്റെ രണ്ടാം ഇന്നിങ്സ് പുനരാരംഭിച്ചത്. മുന്നിര ബാറ്റര് ജേക്കബ് ബഥേല് സെഞ്ചുറിയുമായി ക്രീസിലുണ്ടെന്ന ആശ്വാസം മാത്രമേ ഉണ്ടായിരുന്നുള്ളൂ. പക്ഷെ പോരാട്ട വീര്യം അധികം നീണ്ടില്ല. സ്റ്റാര്ക്കിന് വിക്കറ്റ് സമ്മാനിച്ച് ബഥേല്(154) മടങ്ങി. ഇംഗ്ലണ്ട് സ്കോര് ഒമ്പതിന് 328. അവസാന വിക്കറ്റില് മാത്യൂ പോട്ട്സും(പുറത്താകാതെ 18) ജോഷ് ടംഗും ചേര്ന്ന് 14 റണ്സ് കൂടി ചേര്ത്തതോടെ ഇംഗ്ലണ്ട് ഇന്നിങ്സിനെ ഓസീസ് തീര്ത്തു. സ്റ്റാര് ബൗളര് സ്റ്റാര്ക്കിനായിരുന്നു അവസാന വിക്കറ്റും.
ആദ്യ ഇന്നിങ്സില് ട്രാവിസ് ഹെഡ് നേടിയ സെഞ്ചുറിമികവിന്റെ ബലത്തിലാണ് താരം കളിയിലെ താരമായത്. ഹെഡിന്റെ 163 റണ്സിന്റെ ബലത്തില് ഓസീസ് ഒന്നാം ഇന്നിങ്സില് 183 റണ്സിന്റെ നിര്ണായക ലീഡ് നേടിയിരുന്നു.
ആദ്യ മൂന്ന് മത്സരത്തിലും തുടര് വിജയം നേടി ഓസീസ് പരമ്പര ഉറപ്പിക്കുന്നതിന് പിന്നില് മിച്ചല് സ്റ്റാര്ക്കിന്റെ മിന്നല് ബൗളിങ് പ്രധാന പങ്കുവഹിച്ചിരുന്നു. ഇതിന്റെ അടിസ്ഥാനത്തിലാണ് സ്റ്റാര്ക് പരമ്പരയുടെ സ്റ്റാര് ആയത്.
പരമ്പരയിലെ ആദ്യ മൂന്ന് മത്സരങ്ങളും ജയിച്ച ഓസ്ട്രേലിയ മെല്ബണില് നടന്ന ബോക്സിങ് ഡേ ടെസ്റ്റില് ഇംഗ്ലണ്ടിനോട് പരാജയപ്പെട്ടിരുന്നു. ഒടുവില് സിഡ്നി വിജയത്തോടെയാണ് 4-1ന് പരമ്പര നേട്ടം കൈവരിച്ചത്.
