ജനീവ: ഹിമയുഗത്തില് വംശനാശം സംഭവിച്ച വൂളി മാമത്തുകളെ ജനിതക എന്ജിനീയറിങ്ങിലൂടെ തിരികെ കൊണ്ടുവരാനുള്ള പരീക്ഷണങ്ങള് തുടങ്ങി. ഡീ എക്സ്റ്റിങ്ഷന് അഥവാ വംശനാശപുനരുത്ഥാനം എന്നാണ് ഇതിനെ പറയുന്നത്. ഡീ എക്സ്റ്റിങ്ഷന് കമ്പനിയായ കൊളോസല് ബയോസയന്സാണ് ഈ ദൗത്യത്തിന് പിന്നില്. പൂര്ണമായും ഒരു മാമത്തിനെ സൃഷ്ടിക്കുക എന്നതിലുപരി, മാമത്തുകളുടെ ഡിഎന്എ ഉപയോഗിച്ച് ആധുനിക ആനകളില് ജനിതകമാറ്റം വരുത്തുകയാണ് ലക്ഷ്യം.
മാമത്തുകളുടെ പ്രത്യേകതകളായ കട്ടിയുള്ള രോമങ്ങള്, ചെറിയ ചെവികള്, കൂടുതല് കൊഴുപ്പ് എന്നിവയ്ക്ക് കാരണമായ ജീനുകള് ഏഷ്യന് ആനയുടെ ഭ്രൂണത്തില് നിക്ഷേപിക്കും. ഈ ഭ്രൂണം വളര്ത്താന് ഒരു പെണ് ആനയെ ഉപയോഗിക്കുന്നതിനുപകരം കൃത്രിമ ഗര്ഭപാത്രം ഉപയോഗിക്കാനാണ് ശാസ്ത്രജ്ഞര് പദ്ധതിയിടുന്നത്.
ആര്ട്ടിക് മേഖലയിലെ മഞ്ഞുരുകുന്നത് തടയാന് മാമത്തുകള്ക്ക് കഴിയും. ഇവ മഞ്ഞുപാളികളെ ചവിട്ടിയുറപ്പിക്കും. എന്നാല്, മാമത്തുകള്ക്ക് ഇന്നത്തെ മാറിയ കാലാവസ്ഥയില് അതിജീവിക്കാന് കഴിയുമോ എന്ന ആശങ്കയും ഉയരുന്നു. പരീക്ഷണത്തിന്റെ ഭാഗമായി 2028ല് ആദ്യത്തെ ‘മാമത്ത് കുട്ടി’ ജനിക്കുമെന്നാണ് ശാസ്ത്രജ്ഞര് പ്രതീക്ഷിക്കുന്നത്.
