പുനര്‍ജനി ഫണ്ട് തട്ടിപ്പ് വിവാദത്തില്‍ പുറത്തുവന്ന വിവരങ്ങള്‍ വി.ഡി.സതീശന് കുരുക്കാകുന്നു

തിരുവനന്തപുരം: പുനര്‍ജനി ഫണ്ട് തട്ടിപ്പ് വിവാദത്തില്‍ പുറത്തുവന്ന വിവരങ്ങള്‍ പ്രതിപക്ഷ നേതാവ് വി.ഡി.സതീശന് കുരുക്കാകുന്നു. സ്വകാര്യ വിദേശയാത്രക്കിടെ ഫണ്ട് പിരിവ് നടത്തിയതും മണപ്പാട്ട് ഫൗണ്ടേഷന്‍ ചെയര്‍മാന്‍ അമീര്‍ അഹമ്മദുമായി അവിശുദ്ധ കൂട്ടുകെട്ടും ഗൂഢാലോചനയും നടന്നെന്നുമുള്ള വിജിലന്‍സ് കണ്ടെത്തലുമാണ് വി.ഡി. സതീശന് കുരുക്കാകുന്നത്.

ചരിത്രപ്രാധാന്യമുള്ള സ്ഥലങ്ങള്‍ സന്ദര്‍ശിക്കുന്നതിനായാണ് കേന്ദ്ര ആഭ്യന്തരമന്ത്രാലയം സതീശന് യുകെ യാത്രയ്‌ക്കുള്ള അനുമതി നല്‍കിയത്. എന്നാല്‍ സ്വകാര്യ ആവശ്യത്തിന് നല്‍കിയ യാത്രാ അനുമതി ദുരുപയോഗം ചെയ്ത് യുകെ സന്ദര്‍ശനത്തിനിടെ ഫണ്ട് പിരിവ് നടത്തിയതായാണ് വിജിലന്‍സ് കണ്ടെത്തല്‍. സ്വകാര്യ ആവശ്യത്തിനാണെന്നറിയിച്ചാണ് നിയമസഭാ സെക്രട്ടറിയില്‍ നിന്ന് എന്‍ഒസി വാങ്ങി കേന്ദ്രസര്‍ക്കാരില്‍ നിന്നും യാത്രാ അനുമതി വാങ്ങിയത്.

മണപ്പാട് ഫൗണ്ടേഷന്‍ യുകെയില്‍ നടത്തിയ ഫണ്ട് സമാഹരണ പരിപാടിയില്‍ സതീശന്‍ പങ്കെടുത്തെന്ന് മാത്രമല്ല ഓരോരുത്തരോടും 500 പൗണ്ട് വീതം സംഭാവന ആവശ്യപ്പെട്ടെന്നും വിജിലന്‍സ് കണ്ടെത്തി. ഇത് എഫ്‌സിആര്‍എ നിയമത്തിന്റെ ലംഘനമാണ്. ഫണ്ട് പിരിവിനായി മണപ്പാട് ഫൗണ്ടേഷന്‍ ചെയര്‍മാന്‍ അമീര്‍ അഹമ്മദുമായി ഗൂഢാലോചന നടത്തിയെന്നും വിജിലന്‍സ് റിപ്പോര്‍ട്ടിലുണ്ട്.

പുനര്‍ജനി പദ്ധതിക്കായി മണപ്പാട്ട് ഫൗണ്ടേഷന്‍ ആരംഭിച്ച ബാങ്ക് അക്കൗണ്ടില്‍ 2018 നവംബര്‍ 27മുതല്‍ 2022 മാര്‍ച്ച് എട്ടു വരെ പണമെത്തി. പുനര്‍ജനി സ്‌പെഷല്‍ അക്കൗണ്ട് വഴിയും മണപ്പാട്ട് ഫൗണ്ടേഷന്റെ എഫ്‌സിആര്‍എ/കറന്റ് അക്കൗണ്ട് വഴിയുമാണ് പണം സ്വരൂപിച്ചത്. പദ്ധതിക്കായി 1.27കോടി രൂപ പിരിച്ചെടുത്തു. യുകെയില്‍ നിന്ന് പണം സ്വരൂപിച്ച മിഡ്‌ലാന്‍ഡ്‌സ് ഇന്റര്‍നാഷണല്‍ എയ്ഡ് ട്രസ്റ്റും ആ പണം നാട്ടിലേക്കയച്ച മണപ്പാട്ട് ഫൗണ്ടേഷനും തമ്മില്‍ ധാരണാപത്രം ഒപ്പു വച്ചിട്ടില്ല.

വി.ഡി.സതീശന്‍ യുകെയിലേക്ക് പോയതും തിരികെ വന്നതും മണപ്പാട്ട് ഫൗണ്ടേഷന്‍ ചെയര്‍മാന്‍ അമീര്‍ അഹമ്മദ് തരപ്പെടുത്തിയ ഒമാന്‍ എയര്‍വെയ്‌സിന്റെ കോംപ്ലിമെന്ററി ടിക്കറ്റിലാണ്. ടിക്കറ്റിന് നികുതി അടച്ചിരിക്കുന്നത് മണപ്പാട്ട് ഫൗണ്ടേഷനും. സതീശന്റെ യുകെയിലെ താമസ സൗകര്യവും മറ്റു ചെലവുകളും വഹിച്ചത് മണപ്പാട്ട് ഫൗണ്ടേഷനാണെന്ന് ചെയര്‍മാന്‍ അമീര്‍ അഹമ്മദ് വിജിലന്‍സിനോട് വ്യക്തമാക്കിയിട്ടുണ്ട്. മൂന്ന് മാസം മുന്‍പ് വിജിലന്‍സ് സമര്‍പ്പിച്ച അന്വേഷണ റിപ്പോര്‍ട്ടില്‍ സതീശനെ കുറ്റവിമുക്തനാക്കിയെങ്കിലും അതിനും എട്ട് മാസം മുന്‍പ് സിബിഐ അന്വേഷണം ആവശ്യപ്പെട്ട് വിജിലന്‍സ് നല്‍കിയ റിപ്പോര്‍ട്ടിലെ ഉള്ളടക്കമാണ് ഇപ്പോള്‍ കുരുക്കായിരിക്കുന്നത്.