കൊല്ലം : പൊതുസമ്മതനല്ലാത്ത ആളെ മേയര് സ്ഥാനാര്ഥിയായി ഉയര്ത്തിക്കാട്ടിയത് തിരിച്ചടി ആയെന്ന് സിപിഎം റിപ്പോര്ട്ട്.ഇതോടെ ജില്ലാ സെക്രട്ടേറിയറ്റ് അംഗവും മേയര് സ്ഥാനാര്ഥിയുമായിരുന്ന വി കെ അനിരുദ്ധന് ജില്ലാ കമ്മിറ്റിയില് നിന്ന് വികാരധീനനായി ഇറങ്ങിപ്പോയി.സിപിഎം സംസ്ഥാന സെക്രട്ടറി എം വി ഗോവിന്ദന് പങ്കെടുത്ത ജില്ലാ കമ്മിറ്റി യോഗത്തില് നിന്നാണ് വി കെ അനിരുദ്ധന് ഇറങ്ങി പോയത്.കൊല്ലം കോര്പ്പറേഷന് തോല്വി സംബന്ധിച്ച റിപ്പോര്ട്ടിംഗിനിടയാണ് സംഭവം.
നാടകവും സാംബശിവന്റെ കഥാപ്രസംഗവും കണ്ടാണ് സി പി എമ്മില് എത്തിയതെന്ന് യോഗത്തില് വി കെ അനിരുദ്ധന് പറഞ്ഞു.പാര്ട്ടിയാണ് തനിക്ക് എല്ലാം.ഇങ്ങനെ പറഞ്ഞ
ശേഷമായിരുന്നു വി കെ അനിരുദ്ധന് ഇറങ്ങിപ്പോയത്.
കൊല്ലം കോര്പ്പറേഷനില് കാല്നൂറ്റാണ്ടുകാലത്തെ ഇടതു ഭരണത്തിന് അന്ത്യം കുറിച്ചാണ് യു.ഡി.എഫ് വിജയിച്ചത്. സംസ്ഥാനത്ത് മുമ്പ് ശക്തമായ യു ഡി എഫ് തരംഗത്തില് പോലും ഇളകാതിരുന്ന കൊല്ലം കോര്പ്പറേഷനിലെ കനത്ത തോല്വി എല് ഡി എഫിന് കനത്ത ആഘാതമാണ് ഉണ്ടാക്കിയത്.
കോണ്ഗ്രസ് 22 ഇടങ്ങളിലും ആര് എസ് പി മൂന്ന് ഇടങ്ങളിലും മുസ്ലിം ലീഗ് രണ്ട് ഇടങ്ങളിലും വിജയിച്ചു. കഴിഞ്ഞ തവണ 38 സീറ്റില് വിജയിച്ച എല്ഡിഎഫ് 16 സീറ്റിലേക്ക് ഒതുങ്ങി.സിപിഎം 13 ഇടത്തും സിപിഐ മൂന്ന് ഇടങ്ങളിലുമാണ് ജയിച്ചത് .ബി ജെ പി 6 സീറ്റില് നിന്ന് 12 സീറ്റിലേക്ക് കുതിച്ച് ചാട്ടം നടത്തി.
