പത്തനംതിട്ട: കയറ്റുമതി മേഖലയ്ക്ക് ഉത്തേജനമേകാന് 7295 കോടി രൂപയുടെ കേന്ദ്ര പാക്കേജ്. 5181 കോടി രൂപ പലിശ ഇളവിനും 2114 കോടി രൂപ ഈട് സഹായത്തിനുമായാണ് ഈ തുക അനുവദിച്ചത്. ആറു വര്ഷം കൊണ്ടാണ് പദ്ധതി നടപ്പാക്കുക. പദ്ധതി പ്രകാരം പ്രീ ആന്ഡ് പോസ്റ്റ് ഷിപ്പ്മെന്റ് കയറ്റുമതിക്കാര്ക്ക് സബ്സിഡി ലഭിക്കും. ഇതുവഴി കയറ്റുമതിക്കാര്ക്ക് വായ്പാ ചെലവ് കുറയ്ക്കാനാകും. അടുത്തകാലത്ത് യു.എസ്. ഏര്പ്പെടുത്തിയ ഉയര്ന്ന തീരുവയുടെ പശ്ചാത്തലത്തില് രാജ്യാന്തര വിപണിയില് ഭാരതീയ ഉത്പന്നങ്ങളുടെ മത്സര ക്ഷമത വര്ദ്ധിപ്പിക്കാനും ഇതിലൂടെ കഴിയും. കഴിഞ്ഞ നവംബറില് അംഗീകരിച്ച 25,060 കോടി രൂപയുടെ കയറ്റുമതി പ്രോത്സാഹന ദൗത്യത്തിന്റെ രണ്ടാം ഘട്ടമായാണ് പുതിയ പാക്കേജ് പ്രഖ്യാപിച്ചിരിക്കുന്നത്.
അതേസമയം റിസര്വ് ബാങ്കിന്റെ കണക്കുകൂട്ടലുകളെ പോലും മറികടന്ന് ഭാരതം സാമ്പത്തിക മേഖലയില് മുന്നേറ്റം തുടരുകയാണ്. നടപ്പ് സാമ്പത്തിക വര്ഷത്തിന്റെ രണ്ടാം പാദത്തില് സാമ്പത്തിക വളര്ച്ച 8.2 ശതമാനം ആയി. റിസര്വ് ബാങ്കിന്റെ അനുമാനം 7 ശതമാനം മാത്രമായിരുന്നു. മിക്ക റേറ്റിങ് ഏജന്സികളും 7 മുതല് 7.5 ശതമാനം വരെ ആണ് പ്രവചിച്ചത് ആദ്യ പാദത്തില് 7.2 ശതമാനം ആയിരുന്നു വളര്ച്ച. ഈ സാമ്പത്തിക വര്ഷത്തില് ഇത് 6.3 മുതല് 6.8 ശതമാനം വരെ സമ്പദ്വ്യവസ്ഥ വളരും എന്നായിരുന്നു നാഷണല് സ്റ്റാറ്റിസ്റ്റിക്കല്സ് ഓഫീസിന്റെ അനുമാനം. രാജ്യത്ത് ഉത്പാദന മേഖലയിലും ഗണ്യമായ വളര്ച്ച നേടാനായി. ഉത്പാദന വളര്ച്ച ശരാശരി 2.2 ശതമാനം ആയിരുന്നത് ഇക്കുറി 9.1 ശതമാനമായി. ലോകത്ത് ഏറ്റവും വേഗത്തില് വളരുന്ന സമ്പദ്വ്യവസ്ഥയെന്ന സ്ഥാനമാണ് ഇതോടെ ഭാരതത്തിനു കൈവന്നിരിക്കുന്നത്.
ജന്മഭൂമി ഓണ്ലൈന്