ഈറോഡ്: സ്വയംപര്യാപ്ത ഗ്രാമങ്ങള്ക്ക് വികസിതഭാരതം ജി റാം ജി നിയമം അടിത്തറ പാകുമെന്ന് കേന്ദ്ര കൃഷിവകുപ്പ് മന്ത്രി ശിവരാജ് സിങ് ചൗഹാന്. ഈറോഡില് കര്ഷകരുമായും തൊഴിലാളികളുമായും ആശയവിനിമയം നടത്തുകയായിരുന്നു അദ്ദേഹം. തൊഴിലവസരങ്ങള് സൃഷ്ടിക്കുന്നത് ശക്തിപ്പെടുത്തുന്നതിനും അടിസ്ഥാന സൗകര്യങ്ങള് വിപുലീകരിക്കുന്നതിനും ഗ്രാമങ്ങളില് സ്വയം പര്യാപ്തത പ്രോത്സാഹിപ്പിക്കുന്നതിനുമുള്ള മൂര്ത്തമായ ശ്രമമാണ് ഈ നിയമമെന്ന് അദ്ദേഹം പറഞ്ഞു. പൊതുജന പങ്കാളിത്തത്തിലൂടെ മാത്രമേ വികസിതവും സമൃദ്ധവുമായ ഗ്രാമങ്ങള് എന്ന ലക്ഷ്യം കൈവരിക്കാനാകൂവെന്നും അദ്ദേഹം പറഞ്ഞു.
പുതിയ നിയമം ഗ്രാമസഭകള്ക്ക് കൂടുതല് അധികാരം നല്കുന്നു. ഗ്രാമങ്ങളില് എന്തൊക്കെ വികസന പ്രവര്ത്തനങ്ങള് നടത്തണമെന്ന് ഇനി മുതല് ഗ്രാമസഭകള്ക്ക് തീരുമാനിക്കാം. വികസനവുമായി ബന്ധപ്പെട്ട തീരുമാനങ്ങള് ഇനി ഗ്രാമതലത്തില് തന്നെയായിരിക്കും. പദ്ധതി സം ബന്ധിച്ച് ചിലര് മന:പൂര്വ്വം തെറ്റായ വിവരങ്ങള് പ്രചരിപ്പിക്കുകയാണ്. തൊഴിലാളികള്ക്കും ജീവനക്കാര്ക്കുമുള്ള പണം നേരിട്ട് അവരുടെ ബാങ്ക് അക്കൗണ്ടുകളിലേക്ക് എത്തും. അഴിമതിക്ക് യാതൊരു പഴുതും നല്കാതിരിക്കാനുമാണ് പ്രധാനമന്ത്രി നരേന്ദ്രമോദി പുതിയ പദ്ധതി കൊണ്ടുവന്നതെന്നും അദ്ദേഹം പറഞ്ഞു.
ഈറോഡിലെ മഞ്ഞള് മാര്ക്കറ്റ് ശിവരാജ് സിങ് ചൗഹാന് സന്ദര്ശിച്ചു. മഞ്ഞള് കര്ഷകരും വ്യാപാരികളുമായും അദ്ദേഹം സംവദിച്ചു. ഈറോഡില് മഞ്ഞള് പരിശോധനാ ലബോറട്ടറി സ്ഥാപിക്കുമെന്ന് അദ്ദേഹം അറിയിച്ചു. ഗുണനിലവാര പരിശോധന, സര്ട്ടിഫിക്കേഷന്, മഞ്ഞളിന്റെ മികച്ച വിപണനം എന്നിവയ്ക്ക് ഈ സൗകര്യം കര്ഷകരെ സഹായിക്കുമെന്ന് അദ്ദേഹം പറഞ്ഞു. ഇന്ത്യന് കാര്ഷിക ഗവേഷണ കൗണ്സിലിന് (ഐസിഎആര്) ആവശ്യമായ നിര്ദ്ദേശങ്ങള് നല്കി. ഈറോഡില് മഞ്ഞള് ബോര്ഡിന്റെ ഒരു പ്രാദേശിക കേന്ദ്രം സ്ഥാപിക്കുമെന്നും കേന്ദ്രമന്ത്രി ഉറപ്പുനല്കി. വനിതാ കര്ഷകര്, വിവിധ കര്ഷക സംഘടനാ പ്രതിനിധികള് എന്നിവരുമായും ശിവരാജ് സിങ് ചൗഹാന് സംവദിച്ചു.
