ടെഹ്റാന് : വെനസ്വേലയുടെ നേതാവ് നിക്കോളാസ് മഡൂറോയ്ക്ക് ശേഷം ട്രംപിന്റെ ഡെല്റ്റാ ഫോഴ്സ് ഇനി ജീവനോടെ ബന്ദിയാക്കുക ഇറാന്റെ പരമോന്നത ആത്മീയ നേതാവിനെയാണെന്ന അഭ്യൂഹം പരക്കുന്നു. ആയത്തൊള്ള ഖൊമേനിയ്ക്കായി ട്രംപ് വല വിരിച്ചുകഴിഞ്ഞുവെന്നും ഉടന് പിടികൂടുമെന്നുമാണ് അഭ്യൂഹം.
ഇറാനില് ഖൊമേനി ഭരണത്തിനെതിരെ പ്രതിഷേധപ്രകടനം നടത്തുന്നവര്ക്ക് നേരെ നടന്ന വെടിവെയ്പില് 16 പേര് കൊല്ലപ്പെട്ടുകഴിഞ്ഞു. ലഹളക്കാരെ അടിച്ചമര്ത്താനാണ് ഖൊമേനി പട്ടാളക്കാര്ക്ക് നിര്ദേശം നല്കിയിരിക്കുന്നത്. എങ്കിലും ടെഹ്റാന് മുതല് ഷിറാസ് വരെ, മഷാദ് മുതല് മലേഷാഹി വരെ പ്രകടനക്കാര് ശക്തമായ പ്രതിഷേധപ്രകടനങ്ങളാണ് നടത്തുന്നത്.
കലാപകാരികളായ ശത്രുക്കള്ക്ക് മുന്പില് കീഴടങ്ങുന്ന പ്രശ്നമില്ലെന്ന് ആയത്തൊള്ള ഖൊമേനി പ്രഖ്യാപിച്ചിരിക്കുകയാണ്. എന്നാല് ഖൊമേനിയുടെ ഈ പ്രസ്താവനയ്ക്ക് മറുപടി നല്കിയിരിക്കുന്നത് എക്സ് എന്ന സാമൂഹ്യമാധ്യമത്തിന്റെ ഉടമ ഇലോണ് മസ്കാണ്. കലാപകാരികള്ക്ക് മുന്പില് കീഴടങ്ങില്ലെന്നത് സ്വപ്നങ്ങളില് മാത്രമേ സാധ്യമാകൂ എന്നാണ് ഇലോണ് മസ്ക് പ്രസ്താവിച്ചിരിക്കുന്നത്.
കലാപകാരികളോട് നിയന്ത്രണം പാലിക്കാന് യൂറോപ്പ് ആവശ്യപ്പെടുന്നുണ്ടെങ്കിലും വെനസ്വേലയുടെ മഡൂറോയെ പിടികൂടിയതോടെ ഇറാനിലെ കലാപകാരികള്ക്ക് ആവേശം ഇരട്ടിയായിരിക്കുകയാണ്. എന്തായാലും ട്രംപ് തങ്ങളുടെ രക്ഷയ്ക്കെത്തും എന്ന് അവര് കരുതുന്നു. കലാപകാരികളെ അടിച്ചൊതുക്കാന് ശ്രമിച്ചാല് ഇറാനെ ആക്രമിക്കുമെന്ന് ട്രംപ് താക്കീത് നല്കിയിരുന്നു. എന്നാല് ട്രംപിനെ തള്ളിയാണ് ഖൊമേനി പട്ടാളക്കാര്ക്ക് സമരക്കാരെ അടിച്ചൊതുക്കാന് ആങ്വാനം നല്കിയിരിക്കുന്നത്.
കടുത്ത സാമ്പത്തിക പ്രതിസന്ധി കലാപത്തിന് കാരണമാവുന്നു
ഇസ്രയേലുമായുള്ള യുദ്ധത്തില് തകര്ന്ന ശേഷം ഇറാന് കടുത്ത സാമ്പത്തിക പ്രതിസന്ധി നേരിടുകയാണ്. ഒരു ഭാഗത്ത് വിലക്കയറ്റവും മറുഭാഗത്ത് ഇറാന് കറന്സിയുടെ മൂല്യത്തകര്ച്ചയും രാജ്യത്തെ വലിയ പ്രതിസന്ധിയിലാക്കിയതോടെയാണ് ജനങ്ങള് കലാപത്തിലേക്ക് തിരിഞ്ഞിരിക്കുന്നത്. രാജ്യത്തിന്റെ ശത്രുക്കളുടെ പ്രേരണയാല് ഒരു കൂട്ടം ആളുകള് വ്യവസായികളുടെയും കടയുടമകളുടെയും പിന്നില് നിന്നും ഇറാനെതിരെ മുദ്രാവാക്യം മുഴക്കുകയാണെന്നും എല്ലാറ്റിനും പിന്നില് അമേരിക്കയും ഇസ്രയേലുമാണെന്നും ഖൊമേനി കുറ്റപ്പെടുത്തുന്നു. നേരത്തെ ഖ്വോമിലും ഹര്സനിലുമായി ഒതുങ്ങി നിന്ന പ്രക്ഷോഭം എല്ലായിടങ്ങളിലേക്കും പരക്കുകയാണ്.
