ഭാരതം എന്ന പുഴ. സൗകര്യത്തിന് ഭാരതപ്പുഴ എന്ന് വിളിക്കാം. പുഴ ശാന്തമായി ഒഴുകിയിരുന്നു. കണ്ണാടിപോലെ തെളിഞ്ഞ വെള്ളം. അടിത്തട്ടുവരെ വ്യക്തമായി കാണാമായിരുന്നു. മീനുകള് ആര്ത്തുല്ലസിച്ച് ഒഴുക്കിനെതിരെ തിരിഞ്ഞുനിന്ന് ഭരതനാട്യം കളിക്കുന്നു. മലനിരകളില് നിന്നും ഔഷധസസ്യങ്ങളെ തഴുകി ഒഴുകി വരുന്നതിനാല് ഔഷധഗുണമുള്ള വെള്ളമായിരുന്നു പുഴയിലേത്. മലമുകളില് നിന്ന് തട്ടിയും മുട്ടിയും ഒഴുകിയെത്തി. പാറകല്ലുകള് മിനുസമുള്ള ആകര്ഷകമയാ രൂപം കൈവരിച്ച് പുഴയുടെ അടിത്തട്ടില് വിശ്രമിക്കുന്നത് കാണാമായിരുന്നു. സമ്പന്നമായിരുന്നു പുഴ. അറിവുകളുടെ നിലവറയായിരുന്നു പുഴയും പുഴയോരങ്ങളും.
അതിസൗന്ദര്യം സ്ത്രീക്ക് ആപത്ത് വിളിച്ചുവരുത്തുന്നതുപോലെ, പുഴയുടെ സമ്പന്നത വിദേശികളെ പുഴയോരത്തേക്ക് എത്തിച്ചു. അവര് അനധികൃതമായി പുഴയോരങ്ങള് കീഴടക്കി. പ്രകൃതി സമ്പത്തുക്കള് ക്രമാതീതമായി ചുഷണം ചെയ്ത് പുഴയുടെ ഇരുകരകളിലും കച്ചവടസ്ഥാപനങ്ങള് സ്ഥാപിച്ച് വിവിധ തരം ഉല്പ്പന്നങ്ങള് ശേഖരിച്ച് വിദേശങ്ങളിലേക്ക് കടത്തി സമ്പത്ത് ഉണ്ടാക്കി. പുഴയുടെ ആത്മാവും സംസ്കാരവും പോലും കൊള്ളയടിക്കപ്പെട്ടു. അഴുക്കു ചാലുകള് പുഴയിലേയ്ക്ക് നീട്ടി. അവശിഷ്ടങ്ങള് പുഴയിലേക്ക് തള്ളി. പുഴ മലിനമാക്കി. പുഴ മുഴുവനും പഴുത്തു. മാലിന്യങ്ങള് നിറഞ്ഞു. പുഴയോരം ചീഞ്ഞുനാറി.
നാറ്റം സഹിക്കാനാവാതെ ജനങ്ങള് ഉണര്ന്നു. നഷ്ടപ്പെട്ടുപോയ സൗഭാഗ്യങ്ങള് ഓര്ത്ത് വിലപിച്ചു. ഇന്നത്തെ ദുര്യോഗങ്ങള് വന്നവഴികള് അന്വേഷിച്ച് കണ്ടെത്തി. അസംഘടിത ജനതയുടെ തമ്മില് തല്ലുകളാണ് ദുര്യോഗങ്ങള് വിളിച്ചുവരുത്തിയതെന്ന് തിരിച്ചറിഞ്ഞു. നഷ്ടപ്പെട്ടുപോയ സൗഭാഗ്യങ്ങള് ഏതു വിധേനയും തിരിച്ചുപിടിക്കാന് തീരുമാനിച്ചു. സംഘടിത ശക്തിയായി വളര്ന്നു. വിവിധങ്ങളായ സമരമരങ്ങള് നട്ടുവളര്ത്തി. വെള്ളവും വെളിച്ചവും വളവും നല്കി പരിപാലിച്ചു. അവസാനം പുഴകൊള്ളയടിച്ചവരെ തുരത്തിയോടിക്കുവാന് കഴിഞ്ഞു.
പക്ഷേ അഴുക്കായ പുഴ ശുദ്ധീകരിക്കുവാന് ഉത്തരവാദ്ത്വബോധമുള്ളവര് ഇന്നും പെടാപാടുപെടുകയാണ്. വളരെക്കാലത്തെ കഠിനാദ്ധ്വാനം കൊണ്ടേ പുഴയെ പുര്വ്വസ്ഥിതിയിലാക്കുവാന് കഴിയൂ എന്ന് ജനം തിരിച്ചറിയുന്നു. കൊള്ളക്കാരെ തുരത്തി പിടിച്ചെടുത്ത പുഴയിലെ അഴുക്കായ അവശിഷ്ടങ്ങള് കാര്യക്ഷമമായി ആത്മാര്ത്ഥതയോടെ ശുദ്ധീകരിക്കുവാന് തുടങ്ങിയിട്ട് പത്ത് സംവത്സരങ്ങളെയായിട്ടുള്ളൂ. അടുത്ത ഒരു ദശാംബ്ദം കൂടി കഠിനശ്രമം നടത്തിയാല് പുഴയെ പഴയെ പുണ്യാഹം പോലെയായി മാറ്റിയെടുക്കുവാന് കഴിയും.
ജന്മഭൂമി ഓണ്ലൈന്