ജയ്പുർ: വിദ്യാർത്ഥികളുടെ സുരക്ഷാ കാര്യത്തിലെ ഗുരുതരമായ വീഴ്ചകളും ആവർത്തിച്ചുള്ള ചട്ടലംഘനങ്ങളും കണ്ടെത്തിയതിനെ തുടർന്ന് ജയ്പൂരിലെ നീരജ മോഡി സ്്കൂളിന്റെ അഫിലിയേഷൻ സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (സിബിഎസ്ഇ) പിൻവലിച്ചു. നവംബർ ഒന്നിന് നാലാം ക്ലാസ് വിദ്യാർത്ഥിനി ആത്മഹത്യ ചെയ്തതിനെ തുടർന്നാണ് നടപടി. സ്കൂളിന്റെ നാലാം നിലയിൽ നിന്ന് ചാടിയാണ് 9 വയസ്സുള്ള വിദ്യാർത്ഥിനി ആത്മഹത്യ ചെയ്തത്. സീനിയർ സെക്കൻഡറി സ്കൂൾ പരീക്ഷാ തലം വരെയുള്ള സ്കൂളിന്റെ അഫിലിയേഷൻ റദ്ദാക്കിയതായി സിബിഎസ്ഇ പ്രഖ്യാപിച്ചു. ഇതിനു പുറമേ സ്ഥാപനത്തിന് കടുത്ത പിഴ ശിക്ഷകളും ഉണ്ടാകും.
‘അന്വേഷണ റിപ്പോർട്ട്, ലഭ്യമായ രേഖകൾ, സ്കൂളിന്റെ പ്രതികരണം എന്നിവ കണക്കിലെടുക്കുമ്പോൾ, സ്കൂൾ അഫിലിയേഷൻ ബൈ-ലോകളിലെ നിർബന്ധിത വ്യവസ്ഥകൾ ഗുരുതരമായി ലംഘിച്ചിട്ടുണ്ടെന്ന് വ്യക്തമാണ്. വസ്തുതകൾ മൊത്തത്തിൽ കണക്കിലെടുക്കുമ്പോൾ, സ്കൂളിലെ അത്തരം പ്രശ്നങ്ങൾ പരിഹരിക്കുന്നതിൽ കൗൺസിലിംഗ് സംവിധാനത്തിന്റെയും പരിഹാര സംവിധാനത്തിന്റെയും പൂർണ്ണമായ പരാജയം വ്യക്തമാണ്,’ സംഭവിച്ചതെന്ന് മുതിർന്ന സിബിഎസ്ഇ ഉദ്യോഗസ്ഥൻ പറഞ്ഞു.
ഉദ്യോഗസ്ഥരുടെ അഭിപ്രായത്തിൽ, സംഭവവുമായി ബന്ധപ്പെട്ട സാഹചര്യങ്ങൾ പരിശോധിക്കുകയും സ്കൂൾ സുരക്ഷാ മാർഗ്ഗനിർദ്ദേശങ്ങൾ പാലിക്കുന്നുണ്ടോ എന്ന് പരിശോധിക്കുകയും ചെയ്തു. ഒന്നിലധികം നടപടിക്രമങ്ങളിലെ വീഴ്ചകളും കാമ്പസിലെ വിദ്യാർത്ഥികളെ സംരക്ഷിക്കാൻ ഉദ്ദേശിച്ചുള്ള അവശ്യ പ്രോട്ടോക്കോളുകൾ പാലിക്കാത്തതും അന്വേഷണത്തിൽ കണ്ടെത്തിയതായി റിപ്പോർട്ടുണ്ട്. സ്കൂളിന്റെ നടപടികളും വീഴ്ചകളും ഇളവിന് ഇടം നൽകിയില്ലെന്നും ഇത് അഫിലിയേഷൻ ഉടൻ പിൻവലിക്കാൻ കാരണമായെന്നും സിബിഎസ്ഇ എടുത്തുപറഞ്ഞു. ഈ തീരുമാനം സ്ഥാപനത്തിന്റെ അക്കാദമിക് പ്രവർത്തനങ്ങളെ ബാധിക്കാൻ സാധ്യതയുണ്ട്, കൂടാതെ സംസ്ഥാന അധികാരികളുടെ കൂടുതൽ പരിശോധനയ്ക്ക് കാരണമായേക്കാം.
കഴിഞ്ഞ മാസം സ്കൂളിന് ബോർഡ് കാരണം കാണിക്കൽ നോട്ടീസ് നൽകിയിരുന്നു. മാതാപിതാക്കൾ ക്ലാസ് ടീച്ചറുമായും സ്കൂൾ മാനേജ്മെന്റുമായും നടത്തിയ സംഭാഷണങ്ങളും ആശയവിനിമയങ്ങളും ശ്രദ്ധിക്കപ്പെട്ടില്ലെന്ന് ബോർഡ് കണ്ടെത്തിയിരുന്നു. കൂടാതെ അത്തരം സാഹചര്യങ്ങളിൽ സ്കൂൾ ഒരു നടപടിയും സ്വീകരിച്ചിട്ടില്ലെന്നും പരാതി പരിഹാര സംവിധാനത്തിന് വ്യവസ്ഥകൾ പാലിച്ചിട്ടില്ലെന്നും വിലയിരുത്തി.
അന്വേഷണ പാനൽ റിപ്പോർട്ട് അനുസരിച്ച്, ജീവൻ നഷ്ടമായ കുട്ടിയുടെ മാതാപിതാക്കൾ ഒന്നര വർഷത്തിനിടെ മൂന്ന് തവണയിൽ കൂടുതൽ അധ്യാപകർക്കും കോർഡിനേറ്റർമാർക്കും പരാതിപ്പെട്ടിരുന്നു, എന്നിട്ടും സ്കൂളിലെ ആന്റി-ബുള്ളിയിംഗ് കമ്മിറ്റി ഒരിക്കലും മാതാപിതാക്കളെ ബന്ധപ്പെടുകയോ ഇടപെടുകയോ ചെയ്തില്ല. 2025 സെപ്തംബറിൽ, ഒരു അദ്ധ്യാപക-രക്ഷാകർതൃ യോഗ സമയത്ത് ഒരു ആൺകുട്ടി പെൺകുട്ടിയെ ഭീഷണിപ്പെടുത്തുന്നത് പിതാവ് കണ്ടു. ക്ലാസ് ടീച്ചറോട് പരാതിപ്പെട്ടെങ്കിലും പെൺകുട്ടി ‘പൊരുത്തപ്പെടണമെന്ന്’ അദ്ധ്യാപകൻ ഉപദേശിച്ചുവെന്ന് റിപ്പോർട്ടിൽ പറയുന്നു.
സംഭവത്തിന്റെ ഗൗരവം കണക്കിലെടുത്ത്, സിബിഎസ്ഇയുടെ രണ്ടംഗ സമിതി അടുത്ത ദിവസം സ്കൂൾ സന്ദർശിച്ചു. കമ്മിറ്റി പെൺകുട്ടിയുടെ മാതാപിതാക്കളുമായും സംസാരിച്ചു. കമ്മിറ്റിയുടെ അഭിപ്രായത്തിൽ, അന്നത്തെ സംഭവങ്ങൾ അസ്വസ്ഥതയുണ്ടാക്കുന്ന തരത്തിലുള്ള പീഡനവും അവഗണനയും ആണെന്ന് വിലയിരുത്തി. പെൺകുട്ടി സന്തോഷകരമായ മാനസികാവസ്ഥയിലാണ് സ്കൂളിൽ പോയത്. എന്നിരുന്നാലും, രാവിലെ 11 മണിക്ക് ശേഷം, സഹപാഠികളുമായുള്ള ആശയവിനിമയത്തിൽ ചില ആൺകുട്ടികൾ പിന്നെയും ബോർഡ് എഴുതിവെച്ച് അധിക്ഷേപിച്ചു. കമ്മിറ്റി പരിശോധിച്ച സിസിടിവി ദൃശ്യങ്ങളിൽ പെൺകുട്ടി ആൺകുട്ടികളോട് ബോർഡ് മായ്ക്കാൻ ആവർത്തിച്ച് ആവശ്യപ്പെടുന്നത് കാണാം. അവസാന 45 മിനിറ്റിനുള്ളിൽ അഞ്ച് തവണ സഹായം തേടി ക്ലാസ് ടീച്ചറെ സമീപിക്കുന്നതും ദൃശ്യങ്ങളിൽ കാണിച്ചിരുന്നുവെന്ന് റിപ്പോർട്ടിൽ പറയുന്നു.
