തിരുവനന്തപുരം: ശബരിമല സ്വര്ണക്കൊള്ളക്കേസ് അന്വേഷണം ഉന്നതരിലേക്ക് എത്താതിരിക്കാന് പ്രത്യേക അന്വേഷണ സംഘത്തിന് മേല് പോലീസ് ഓഫീസേഴ്സ് അസോസിയേഷന്റെ ഭീഷണി.
സര്ക്കാരിന്റെ നിര്ദേശപ്രകാരമാണ് അന്വേഷണം മരവിപ്പിക്കാനുള്ള അസോസിയേഷന്റെ ഇടപെടല്. സ്ഥലം മാറ്റം, പെന്ഷന് തടയല് അടക്കമുള്ള ഭീഷണിയുമായാണ് അസോസിയേഷന് രംഗത്തുള്ളത്. മുന് ദേവസ്വം മന്ത്രി കടകംപള്ളി സുരേന്ദ്രന് ഉള്പ്പടെ ഉന്നതരിലേക്ക് അന്വേഷണം എത്താതിരിക്കാന് പ്രത്യേക അന്വേഷണ സംഘാംഗങ്ങളെ അസോസിയേഷന് നേതാക്കള് ഭീഷണിയുടെ സ്വരവുമായി സമീപിക്കുകയായിരുന്നു. ആദ്യം രണ്ട് എസ്പിമാരെ ഉപയോഗിച്ച് അന്വേഷണത്തെ മരവിപ്പിക്കാന് മുഖ്യമന്ത്രിയുടെ ഓഫീസില് നിന്നും സമ്മര്ദ്ദമുണ്ടായെങ്കിലും പൂര്ണതോതില് ഫലം കണ്ടില്ല. പിന്നാലെയാണ് അസോസിയേഷനെ രംഗത്തിറക്കിയത്. അന്വേഷണ ഉദ്യോഗസ്ഥന് എസ്പി ശശിധരന് പെന്ഷനാകാന് ഏതാനും വര്ഷം മാത്രമാണുള്ളത്. പെന്ഷനാകുമ്പോള് കാണാമെന്നാണ് ഭീഷണി. മറ്റ് ഉദ്യോഗസ്ഥരോട് അന്വേഷണം കഴിയുമ്പോള് സ്ഥലംമാറ്റം, സസ്പെന്ഷന്, വകുപ്പ് തല നടപടികള് ചൂണ്ടിക്കാട്ടിയാണ് ഭീഷണി. ഇതോടെ അന്വേഷണ സംഘം കടുത്ത സമ്മര്ദ്ദത്തിലാണെന്നാണ് സൂചന.
ശബരിമല സ്വര്ണക്കൊള്ള കേസുമായി ബന്ധപ്പെട്ട് കേരള പോലീസ് ഓഫീസേഴ്സ് അസോസിയേഷന് സംസ്ഥാന പ്രസിഡന്റ് ആര്. പ്രശാന്തിനെ പ്രത്യേക അന്വേഷണ സംഘം ചോദ്യം ചെയ്തിരുന്നു. ഉണ്ണികൃഷ്ണന് പോറ്റിയുമായി അടുത്ത ബന്ധം ഉണ്ടെന്ന് വ്യക്തമായതോടെയാണ് എസ്ഐടി സംഘം മൊഴിയെടുത്തത്. 2011 മുതല് 2019 വരെ ശബരിമലയില് വിജിലന്സ് എസ്ഐആയിരുന്ന പ്രശാന്ത്, ഉണ്ണികൃഷ്ണന്പോറ്റിയുമായി അടുത്ത ബന്ധം പുലര്ത്തിയെന്ന് അന്വേഷണ സംഘം കണ്ടെത്തിയിരുന്നു. നിരവധി തവണ വിദേശയാത്രകളും നടത്തിയിട്ടുണ്ടെന്ന് കണ്ടെത്തിയിട്ടുണ്ട്.
സ്മാര്ട്ട് ക്രിയേഷന്സിന്റെ എംഡിയുമായി അടുത്ത ബന്ധത്തിനുള്ള തെളിവുകളും പുറത്തുവന്നിരുന്നു. ഇതിന് പിന്നാലെയാണ് അസോസിയേഷന് നേതാവിനെ ചോദ്യം ചെയ്തത്. ഇതിലും അന്വേഷണ സംഘത്തിന് ഭീഷണി നേരിട്ടിരുന്നു.
