തിരുവനന്തപുരം: കെഎസ്എഫ്ഇ ‘ഗാലക്സി ചിട്ടി’ പദ്ധതിയുടെ സംസ്ഥാനതല മെഗാ സമ്മാനങ്ങളുടെയും മേഖലാതല (സീരീസ് 1) സമ്മാനങ്ങളുടെയും നറുക്കെടുപ്പില് 75 ലക്ഷം രൂപയുടെ മെഴ്സിഡസ് ബെന്സ് നേടി ഇരിങ്ങാലക്കുട സ്വദേശി ഷക്കീല് കെ.വി. കെഎസ്എഫ്ഇ തൃശൂര് മേഖലയില് ഉള്പ്പെട്ട ഇരിങ്ങാലക്കുട മെയിന് ശാഖയിലെ കസ്റ്റമര് ആണ് ഷക്കീല്.
ഹോട്ടല് ഡിമോറയില് നടന്ന നറുക്കെടുപ്പില് മന്ത്രി കെ.എന്. ബാലഗോപാല് വിജയിയെ പ്രഖ്യാപിച്ചു. മന്ത്രി തത്സമയം നേരിട്ട് ഫോണ് വിളിച്ച് വിജയിയെ അഭിനന്ദിച്ചു. 13.36 കോടി രൂപയുടെ സമ്മാനങ്ങള് ആണ് ഭാഗ്യശാലികളെ കാത്തിരിക്കുന്നതെന്ന് മന്ത്രി പറഞ്ഞു. ജനങ്ങള്ക്ക് കെഎസ്എഫ്ഇയിലുള്ള വിശ്വാസമാണ് ബിസിനസായി പ്രതിഫലിക്കുന്നത്. ബോണ്ടുകളെക്കാളും ഡിബഞ്ചറുകളെക്കാളും മികച്ച റിട്ടേണ് കെഎസ്എഫ്ഇ നല്കുന്നതായി മന്ത്രി പറഞ്ഞു. മേഖലാതല സമ്മാനമായ 17 ഇന്നോവ ക്രിസ്റ്റ കാറുകള്, 170 ഐഫോണുകള് എന്നിവയുടെ നറുക്കെടുപ്പും ഇതോടൊപ്പം നടന്നു. സംസ്ഥാന ഭാഗ്യക്കുറി വകുപ്പിന്റെ നേരിട്ടുള്ള നേതൃത്വത്തിലാണ് നറുക്കെടുപ്പ് നടപടികള് പൂര്ത്തിയായത്.
ചടങ്ങില് കെഎസ്എഫ്ഇ ചെയര്മാന് കെ. വരദരാജന് അധ്യക്ഷനായി. എംഡി ഡോ. സനില് എസ്.കെ. സ്വാഗതവും ഡയറക്ടര് ഡോ. പി. ശശികുമാര് ആശംസയും ജിഎം (ബിസിനസ്) പി. ശ്രീകുമാര് നന്ദിയും പറഞ്ഞു. ഗാലക്സി ചിട്ടി പദ്ധതിയിലൂടെ 2024-25 സാമ്പത്തിക വര്ഷത്തില് 1072.20 കോടി രൂപയുടെ റിക്കാര്ഡ് ബിസിനസ് നേടാന് കെഎസ്എഫ്ഇക്ക് സാധിച്ചതായി ഡോ. സനില് പറഞ്ഞു.
വാര്ഡ് കൗണ്സിലര് ആര്. ഹരികുമാര്, സംസ്ഥാന ലോട്ടറി വകുപ്പ് ജോയിന്റ് ഡയറക്ടര് രാജ്കപൂര് എം., ജീവനക്കാരുടെ സംഘടനാ ജനറല് സെക്രട്ടറിമാരായ എസ്. മുരളികൃഷ്ണ പിള്ള, സല് ജബീല് കെ.ബി., എസ്. വിനോദ്, എസ്. സുശീലന്, ലോട്ടറി വകുപ്പ് ഉദ്യോഗസ്ഥര് തുടങ്ങിയവര് പങ്കെടുത്തു. 2025-26 സാമ്പത്തിക വര്ഷം പ്രഖ്യാപിച്ച ഹാര്മണി ചിട്ടിയില് ചേരുന്ന 100 ഭ്യാഗ്യശാലികള്ക്ക് കുടുംബസമേതം സിങ്കപ്പൂര് യാത്ര (പരമാവധി 2 ലക്ഷം രൂപ) യാണ് മെഗാ സമ്മാനം. 2026 ഫെബ്രു. 28 വരെ ഈ പദ്ധതിയില് ചേരാം.
