ന്യൂദല്ഹി: ഇന്ത്യയില് വൈകാതെ പഹല്ഗാം മാതൃകയിലുള്ള ആക്രമണം നടക്കാന് സാധ്യതയുണ്ടെന്ന് ലഫ്. ജനറല് മനോജ് കുമാര് കത്യാര്. ഇന്ത്യാ ടുഡേയ്ക്ക് നല്കുന്ന അഭിമുഖത്തിലാണ് അദ്ദേഹം ഇക്കാര്യം വെളിപ്പെടുത്തിയത്.
26 ഇന്ത്യന് ടൂറിസ്റ്റുകളെ പട്ടാപ്പകല് പാക് ഭീകരര് ജമ്മു കശ്മീരിലെ പഹല്ഗാമില് വെടിവെച്ച് കൊല്ലുകയായിരുന്നു. ഇതിന് പ്രതികാരമായാണ് ഇന്ത്യ ഓപ്പറേഷന് സിന്ദൂര് നടത്തിയത്. ഇപ്പോള് വീണ്ടും പഹല്ഗാമിന് സമാനമായ ഭീകരാക്രമണം പാകിസ്ഥാന് ഭീകരര് നടത്താന് സാധ്യതയുണ്ടെന്നാണ് ലഫ്. ജനറല് മനോജ് കുമാര് കത്യാര് ചൂണ്ടിക്കാട്ടുന്നത്.
പാകിസ്ഥാന്റെ അധര്മ്മത്തിനെതിരെയാണ് ഇന്ത്യ 1947ലും 1971ലും കാര്ഗില് യുദ്ധത്തിലും ഓപ്പറേഷന് സിന്ദൂറിലും തിരിച്ചടിച്ചതെന്നും അദ്ദേഹം പറഞ്ഞു. ഇന്ത്യന് സേനയുടെ നടപടികള് സമാധാനത്തിനും ശരിയ്ക്കും വേണ്ടിയുള്ളതായിരുന്നുവെന്ന് ഋഗ്വേദവും മഹാഭാരതവും ഉദ്ധരിച്ചുകൊണ്ട് അദ്ദേഹം പറഞ്ഞു.
സാധാരണപൗരന്മാരെ ബാധിക്കാത്ത വിധമാണ് ഇന്ത്യ പാകിസ്ഥാനെതിരെ ധര്മ്മ യുദ്ധം ചെയ്തത്. എന്നാല് പാകിസ്ഥാനാകട്ടെ മറഞ്ഞിരുന്ന് ഭീകരരെ വിട്ട് ഇന്ത്യയ്ക്കെതിരെ യുദ്ധം ചെയ്യുകയാണെന്നും പിടിച്ചുനില്ക്കാന് വേണ്ടി പാകിസ്ഥാന് സേന വീണ്ടും ഭീകരവാദികളെ അയച്ച് ഇന്ത്യയ്ക്കെതിരെ പഹല്ഗാം മാതൃകയില് ആക്രമണം നടത്താന് സകലസാധ്യതകളും ഉണ്ടെന്നും അദ്ദേഹം പറഞ്ഞു.
