തിരുവനന്തപുരം: ശബരിമല സ്വര്ണകൊള്ളയില് ബന്ധമുണ്ടെന്ന് പ്രവാസി വ്യവസായി മൊഴി നല്കിയ തമിഴ്നാട് സ്വദേശി ഡി.മണിയെ തന്നെയാണ് കഴിഞ്ഞ ദിവസം ദിണ്ടിഗലില് കണ്ടെത്തിയതെന്ന് പ്രത്യേക അന്വേഷണ സംഘം. ഡി മണിയെന്ന വിളിപ്പേരുള്ളത് കഴിഞ്ഞ ദിവസം കണ്ടെത്തിയ എംഎസ് മണിക്ക് തന്നെയാണെന്നാണ് എസ്ഐടി സ്ഥിരീകരിക്കുന്നത്. ഇയാളുടെ ഫോട്ടോ കണ്ട പ്രവാസി വ്യവസായിയും ഡി മണി ഇയാള് തന്നെയാണെന്ന് അന്വേഷണ സംഘത്തെ അറിയിച്ചു.
മറ്റുള്ളവരുടെ പേരില് മൂന്ന് ഫോണ് നമ്പറുകളാണ് ഡി മണിക്ക് ഉളളത്.എന്നാല്, ഡി.മണി താനല്ലെന്നും ശബരിമല കൊള്ളയുമായി തനിക്ക് യാതൊരു ബന്ധമില്ലെന്ന് ആവര്ത്തിക്കുകയാണ് ഇയാള്.കേരള പൊലീസും മാധ്യമങ്ങളും വേട്ടയാടുകയാണെന്നും ആരോപണമുന്നയിച്ചു. ഉണ്ണികൃഷ്ണന് പോറ്റിയെ അറിയില്ല. എസ്ഐടിയുടെ ചോദ്യങ്ങള്ക്ക് എല്ലാം മറുപടി നല്കി. കേരളത്തില് ഒരു ബിസിനസും തനിക്കില്ലെന്നും നിരപരാധിയാണെന്നും ഡി മണി പറഞ്ഞു. തനിക്ക് ഒരു തരത്തിലുള്ള സ്വര്ണ വ്യവസായവും ഇല്ലെന്നും സാധാരണക്കാരാനാണ് താനെന്നും മണി പറഞ്ഞു.ആത്മഹത്യയുടെ വക്കിലാണെന്നും ഇയാള് വിങ്ങിപ്പൊട്ടി മാധ്യമങ്ങളോട് പറഞ്ഞു.
എന്നാല്, മണി കളവ് പറയുകയാണെന്നാണ് പ്രത്യേക അന്വേഷണ സംഘം കരുതുന്നത്. ശബരിമല സ്വര്ണക്കടത്തിന് പിന്നില് രാജ്യാന്തര ലോബിയുണ്ടോ എന്നറിയണമെങ്കില് ഡി മണിയെ വിശദമായ ചോദ്യം ചെയ്യണമെന്നാണ് അന്വേഷണ സംഘം പറയുന്നത്. ഇന്നലെ നടത്തിയ പരിശോധനയിലും ചോദ്യം ചെയ്യലിലും ഡി മണി അന്വേഷണ സംഘത്തോട് സഹകരിച്ചില്ല. മണിയുടെ ബാങ്ക് ഇടപാടുകളും പരിശോധിക്കും.
