കണ്ണൂര്: പൊലീസിന് നേരെ ബോംബെറിഞ്ഞ കേസില് കോടതി 20 വര്ഷത്തെ തടവ് ശിക്ഷ വിധിച്ച സിപിഎം നേതാവ് വി.കെ.നിഷാദിന് ജയിലിലായി ഒരു മാസത്തിനുളളില് പരോള്. ഷുക്കൂര് വധവുമായി ബന്ധപ്പെട്ട സംഘര്ഷത്തിലാണ് ഇയാള് പൊലീസിനു നേരെ ബോംബെറിഞ്ഞത്.
കഴിഞ്ഞ മാസമാണ് കോടതി നിഷാദിനെ ശിക്ഷിച്ചത്.കണ്ണൂര് സെന്ട്രല് ജയിലില് ശിക്ഷ അനുഭവിക്കുന്നതിനിടെയാണ് ആറ് ദിവസത്തേക്ക് പരോള് അനുവദിക്കുന്നത്.ഇതിനിടെ തദ്ദേശ തെരഞ്ഞെടുപ്പില് പയ്യന്നൂര് നഗരസഭയിലെ 46-ാം വാര്ഡ് മൊട്ടമ്മലില് നിന്ന് മികച്ച ഭൂരിപക്ഷത്തില് നിഷാദ് വിജയിച്ചിരുന്നു. എന്നാല് ജയിലിലായതിനാല് സത്യപ്രതിജ്ഞ ചെയ്തിട്ടില്ല.തെരഞ്ഞെടുക്കപ്പെട്ട് ഒരു മാസത്തിനുളളില് സത്യപ്രതിജ്ഞ ചെയ്തില്ലെങ്കില് അംഗത്വം നഷ്ടപ്പെടുമെന്നതിനാലാണ് തിടുക്കപ്പെട്ട് പരോള് അനുവദിച്ചതെന്നാണ് കരുതുന്നത്.
എന്നാല് നിഷാദിന്റെ പിതാവിന് കാലിന് ശസ്ത്രക്രിയ ആയതിനാല് ചട്ടപ്രകാരം പരോള് അനുവദിച്ചെന്നാണ് ജയില് അധികൃതരുടെ വിശദീകരണം. നിലവില് 16 കേസുകളില് പ്രതിയാണ് . കൊലപാതകം, സംഘംചേര്ന്ന് ഭീഷണിപ്പെടുത്തല്, മര്ദിക്കല്, പൊതുമുതല് നശിപ്പിക്കല് തുടങ്ങിയ കേസുകളാണ് നിഷാദിനെതിരേയുള്ളത്.
കഴിഞ്ഞ ദിവസങ്ങളില് ടി പി വധക്കേസ് പ്രതികള്ക്ക് ചട്ടവിരുദ്ധമെന്ന് പറയാവുന്ന തരത്തില് പരോള് അനുവദിച്ചിരുന്നു.
